"რა იცი ბიჭო აგენტი რომაა, დადე მტკიცებულება!"... "კაი“ კაცია? არაა აგენტი? ნუ მიყვირი, მამუკა!" - მამუკა მდინარაძისა და ალეკო ელისაშვილის დაპირისპირება
"რა იცი ბიჭო, [ოთარ ფარცხალაძე] აგენტი რომაა, დადე მტკიცებულება", - ასე მიმართა ფრაქცია "ქართული ოცნების“ თავმჯდომარე მამუკა მდინარაძემ, "მოქალაქეების“ ლიდერ ალეკო ელისაშვილს.
როგორც მდინარაძემ აღნიშნა, მტკიცებულებები მათ უნდა დადონ, ვინც ოთარ ფარცხალაძე დაასანქცირა.
"რა იცი ბიჭო აგენტი რომაა, რა იცი? დადე მტკიცებულება! იმათმა დადონ მტკიცებულება, ვინც დაასანქცირა. მომცენ მტკიცებულებები და გამოვიძიებო ეუბნებიან. მტკიცებულებები მომეციო ეხვეწებიან და არ აძლევენ“, - განაცხადა მამუკა მდინარაძემ.
ამასთან, ალეკო ელისაშვილმა მდინარაძეს სთხოვა კონტრდაზვერვის სისტემასთან წვდომის უფლების მიცემა, ოთარ ფარცხალაძის შესახებ ინფორმაციის მოპოვების მიზნით.
"შენ მეუბნები, რომ არ არის ოთარ ფარცხალაძე აგენტი, მე გეუბნები, რომ აგენტია. მიმიშვი კონტრდაზვერვაში და დაგიდებ მტკიცებულებას! "კაი“ კაცია? არაა აგენტი? ნუ მიყვირი მამუკა! "ნაციონალებში“ ნუ შეგეშლები, რა! მე არც "ნაციონალები“ მადარდებს, არც მიშა, არც გრიშა და არც რევოლუციის გეგმა, მე ჩემი საქართველო მადარდებს. მოდი, მოვიწვიოთ სუს-ის უფროსი“, - აღნიშნა ელისაშვილმა.
სიტყვიერი დაპირისპირების შემდეგ მამუკა მდინარაძე და ალეკო ელისაშვილმა დეპუტატების ოთახისკენ გადაინაცვლეს, სადაც მათი თქმით, მმართველი პარტიის დეპუტატს "მოქალაქეების“ ლიდერისთვის უნდა აეხსნა, იყო თუ არა ოთარ ფარცხალაძე ჯაშუში.