ლიბიაში წყალდიდობამ მთავრობასთან დაპირისპირება გამოიწვია: მოსახლეობა გამოძიების დაწყებას ითხოვს
წყალდიდობის შედეგად დაღუპულთა მაღალი რიცხვის გამო, ლიბიელები გამოძიების დაწყებას ითხოვენ. მოსახლეობის თქმით, შაბათს, ქარიშხალ „დანიელის“ მოახლოების დროს, ოფიციალურმა პირებმა მათ სახლში დარჩენისკენ მოუწოდეს და ქალაქის ევაკუაცია არ განახორციელეს.
გარდა ამისა, მოსახლეობა არ იყო ინფორმირებული ორი კაშხლის მდგომარეობის შესახებ - როგორც ჩანს, 2011 წლის შემდეგ, ქალაქთან ახლოს მდებარე კაშხლის ტექნიკური სამუშაოები არ განხორციელებულა.
მიგრაციის საერთაშორისო ორგანიზაციის ცნობით, 30 000 ადამიანს ქალაქის იძულებით დატოვება მოუწია. წყალდიდობამ მთლიანად გაანადგურა დერნასთან მისასვლელი მრავალი გზა. დაავადების გავრცელების თავიდან აცილების მიზნით ასობით ცხედარი მასობრივ სასაფლაოზე დაკრძალეს. დერნას მაცხოვრებლები ასევე ახალი საველე საავადმყოფოს შექმნას ითხოვენ, რადგან ქალაქში არსებული ორი საავადმყოფო „მორგად“ გადაიქცა.
ქვეყანაში საკვებისა და სასმელი წყლის დეფიციტი გაჩნდა. ადგილობრივმა ხელისუფლებამ გარკვეული მარშრუტების გასუფთავება შეძლო, რის შედეგადაც, ჰუმანიტარული კოლონები ქალაქში შევიდნენ.
სამაშველო ჯგუფები ლიბიაში ეგვიპტიდან, ტუნისიდან, არაბთა გაერთიანებული საამიროებიდან, თურქეთიდან და კატარიდან ჩავიდნენ.
შეგახსენებთ, ლიბიაში ძლიერი წყალდიდობა ქარიშხალმა "დანიელმა“ გამოიწვია. ბოლო ინფორმაციით, დაღუპულთა რიცხვი 20 000-მდე შეიძლება გაიზარდოს.