სროლა ბათუმში: მაღაზიაში შეიარაღებული პირი შეიჭრა და ფულს ითხოვდა - თავდამსხმელმა სამართალდამცავების მისამართით გაისროლა
ბათუმში, ლერმონტოვის ქუჩაზე, ღამით სროლა იყო. არსებული ინფორმაციით, მაღაზია "უნივერსამში" შეიარაღებული პირი შეიჭრა და ფულს ითხოვდა. როგორც ცნობილია, მაღაზიიდან მოახერხეს დაცვის პოლიციასთან დაკავშირება.
პოლიციის ადგილზე მისვლის შემდეგ შეიარაღებულმა პირმა პოლიციელების მისამართით გაისროლა და დააკავეს. შემთხვევის შედეგად არავინ დაშავებულა.
- შსს-ს ცნობით, დანაშაული 5-იდან 7 წლამდე ვადით თავისუფლების აღკვეთას ითვალისწინებს.
"გამოძიებით დადგინდა, რომ ბრალდებული ბათუმში, ერთ-ერთ სუპერმარკეტს ყაჩაღურად თავს დაესხა და თანამშრომელს იარაღის მუქარით, 2000 ლარი გასტაცა.
ბრალდებული მიმალვის მცდელობისას სამართალდამცველებს არ დაემორჩილა და მათი მიმართულებით გასროლა განახორციელა, რა დროსაც პოლიციელებმა ის განაიარაღეს და დააკავეს.
მომხდარი შემთხვევის შედეგად არავინ დაშავებულა.
ყაჩაღობის გზით დაუფლებული ფული და დანაშაულის ჩადენის იარაღი პოლიციის მიერ ნივთმტკიცებადაა ამოღებული.
ყაჩაღობის ფაქტზე გამოძიება საქართველოს სისხლის სამართლის კოდექსის 179-ე მუხლით მიმდინარეობს“,- აღნიშნულია უწყების მიერ გავრცელებულ ინფორმაციაში.