"ოჯახის 10 წევრი დამეღუპა... ეს იყო სრული ქაოსი, ნამდვილი კატასტროფა, სიგიჟე" - დამანგრეველ მიწისძვრას გადარჩენილი მაროკოელების მონაყოლი

მაროკოში დამანგრეველ მიწისძვრას 1000-ზე მეტი ადამიანის სიცოცხლე ემსხვერპლა. ადგილობრივი მედიის ინფორმაციით, ამ დროისთვის ნანგრევებიდან გადარჩენილების ამოყვანის სამუშაოები მიმდინარეობს და გარდაცვლილთა რიცხვი დიდი ალბათობით, კიდევ გაიზრდება.

სტიქიის ეპიცენტრი ქალაქ მარაკეშიდან სამხრეთ-დასავლეთით ატლასის მთებში, 71 კმ-ის სიღრმეში დაფიქსირდა.

ადგილობრივები მედიასთან საუბრისას აცხადებენ, რომ მიწისძვრის დროს, მოსახლეობის უმეტესობა სახლში იმყოფებოდა.

"ეს საშინელება თავს ღამით დაგვატყდა. შიშისგან გარეთ გავცვივდით. ხალხი შოკში იყო. მხოლოდ ყვირილის და ბავშვების ტირილის ხმა გვესმოდა. ეს იყო სრული ქაოსი, ნამდვილი კატასტროფა, სიგიჟე“, - ამბობს ერთ-ერთი ადგილობრივი BBC-თან საუბრისას.

მონტასირ იტრი სოფელ ასნიში, მიწისძვრის ეპიცენტრთან ახლოს ცხოვრობს. ის მედიასთან საუბრისას აცხადებს, რომ მიწისძვრის შედეგად მისი ახლობლები ნანგრევების ქვეშ მოყვნენ, მათ გადარჩენას კი ადგილობრივი მოსახლეობა ცდილობს.

"ჩვენი მეზობლები ნანგრევების ქვეშ არიან. ხალხი ბევრს მუშაობს მათ გადასარჩენად სოფელში არსებული საშუალებების გამოყენებით“.

კიდევ ერთი გადარჩენილი აცხადებს, რომ ოჯახის 10 წევრი დაეღუპა - "ოჯახის მინიმუმ 10 წევრი მყავს დაღუპული... ამის დაჯერება ძალიან მიჭირს. სულ ცოტა ხნის მათთან ერთად ვიყავი.“

შეგახსენებთ, რომ 6.8 მაგნიტუდის სიმძლავრის მიწისძვრა მაროკოში 8 სექტემბერს გვიან ღამით მოხდა. 20 წუთის შემდეგ მას განმეორებითი 4.9 მაგნიტუდის სიმძლავრის მიწისქვეშა ბიძგი მოჰყვა.