წინანდლის ფესტივალზე მუსიკალური მარათონი გაიმართა
წინანდლის ფესტივალზე მუსიკალური მარათონი ქართველი პიანისტის ლექსო თორაძის ხსოვნას მიეძღვნა. წელს, მე-20 საუკუნის გამორჩეული კომპოზიტორის სერგეი რახმანინოვის 150 წლისთავს აღნიშნავს მუსიკალური სამყარო. ამ დღეს, ფესტივალის ხუთივე კონცერტზე მისი ნაწარმოები ჟღერდა.
ამერიკაში მოღვაწე პიანისტი ლექსო თორაძე რახმანინოვის ნაწარმოებების უბადლო შემსრულებლად მიიჩნეოდა. მუსიკოსმა ბევრ ქართველ ხელოვანს შეუწყო ხელი, დაემკვიდრებინა თავი უცხოეთში. ჰქონდა საკუთარი სტუდია Toradze Piano Studio, რომელმაც დიდი აღიარება მოიპოვა, როგორც მუსიკალურ-აღმზრდელობითმა ცენტრმა და სადაც პედაგოგიურ მოღვაწეობას თავადაც ეწეოდა. მძიმე სენის მიუხედავად, გარდაცვალებამდე ოცი დღით ადრე, ვანკუვერის სიმფონიურ ორკესტრთან ერთად ბოლო კონცერტი გამართა. მის საშემსრულებლო სტილს ახასიათებდა მასშტაბურობა, რომანტიულობა, არტისტული ტემპერამენტი.
„ამდენი ნიჭის ერთად მოსმენა, ამდენი ახალგაზრდის შემოქმედების გაცნობა - ესაა ამ ფესტივალის მთავარი გზავნილი, რომ ახალგაზრდებს გაუკვალონ გზა დიდ მუსიკალურ სამყაროში. ეს იყო ლექსოს მთავარი მიზანიც. მან 25 წელი მოახმარა ახალგაზრდა მუსიკოსების ხელშეწყობას“ - განაცხადა პიანისტის დამ ნინო თორაძემ.
მარათონი, მუსიკოსმა გიორგი გიგაშვილმა რახმანინოვის თემებზე შექმნილი იმპროვიზაციებით დაასრულა. წინანდლის ფესტივალზე ის მეორედ, 9 სექტემბერს წარსდგება - შუმანის და ლისტის ნაწარმოებით.
„ჩემთვის განსაკუთრებული საღამო იყო. პირველ რიგში, იმის გამო, რომ ჩემს სათაყვანებელ პიანისტს ლექსო თორაძეს ეძღვნებოდა. ასევე იმიტომაც, რომ პირველად შევასრულე იმპროვიზაციები. მიხარია, რომ ჩემი პირველი გამოცდილება მსმენელმა ასე კარგად მიიღო. წინანდლის ფესტივალში მეხუთედ ვმონაწილეობ და მე აქ გავიზარდე“ - აღნიშნა გიორგი გიგაშვილმა.
10 სექტემბრის ჩათვლით, ვირტუოზი სოლისტების და დირიჟორების ვარსკვლავური შემადგენლობა 25 დაუვიწყარ კონცერტს გამართავენ. ფესტივალის სამშვიდობო გზავნილია პან კავკასიური ორკესტრის დაარსება, სადაც კავკასიის და მეზობელი ქვეყნების ახალგაზრდა მუსიკოსები ყოველწლიურად იკრიბებიან და მსოფლიო ვარსკვლავებთან ერთად ჯადოსნურ დღეებს ქმნიან.
“მე ამ ფესტივალის მეგობარი ვარ დაარსების დღიდან. ჩემთვის, ეს პროექტი, როგორც ქართველისთვის, არის უდიდესი სიამაყე. ვთვლი, რომ ეს შერწყმა, ეს სინთეზი - გარემოსი, მუსიკის, ყველაზე წარმატებული შემსრულებლების მთელი მსოფლიოდან - სიტყვებით აღუწერილია” - ამბობს მეცო სოპრანო ირინა შერაზადიშვილი.
წინანდლის ფესტივალის ტრადიციული წარმდგენი კომპანია სილქნეტია.
ბრენდი დაკავშირებულია ისეთ მასშტაბურ პროექტებთან, როგორიცაა შემეცნებითი- სამეცნიერო ჟურნალის National Geographic-ის ქართული რედაქციის დაარსება, სათხილამურო ფედერაციის გენერალური სპონსორობა და საქართველოში პირველი მსოფლიო ჩემპიონატის წარდგენა, წინანდლის ფესტივალის კონტრიბუცია და „დაჭრილ მებრძოლთა თანადგომის ფონდის“ დაფუძნება და დონაცია.
R