"მიწის გამო მომიკლა შვილი, ეს რა გამიკეთა..." - გურჯაანში სახანძრო-სამაშველო სამსახურის თანამშრომელი მოკლეს: რას ამბობს მოკლულის მამა?

მკვლელობა გურჯაანში. 89 წლის კაცმა 35 წლის მეზობელს სანადირო თოფიდან ესროლა. დანაშაული სოფელ ვეჯინში მოხდა. მოკლულია სახანძრო-სამაშველო სამსახურის თანამშრომელი ბექა ჯანიაშვილი. ადგილობრივების ინფორმაციით, პენსიონერ მეზობელს და ჯანიაშვილს კონფლიქტი წლების განმავლობაში მიწის ნაკვეთის გამო ჰქონდა.

შემთხვევამდეც მათ შორის სიტყვიერი შელაპარაკება სწორედ ამ მიზეზით მოხდა.

"წინდაწინ იყვნენ მომზადებულები, ჩაუსაფრდა და ისე მოკლა... მიწის გამო გვქონდა დავა, გამგეობაშიც იცოდნენ. მანამდე შვეხვდით, მკვლელის შვილმა თქვა, ვიღაცა უნდა მოკვდესო... მე ვუთხარი, რას ამბობ-მეთქი. ერთი გასოლის ხმა გავიგე, ვაიმე, შვილო ბექა, ხომ არ გესროლა - მეთქი, გავიქეცი და უკვე უკონტაქტო იყო, სულ სისხლიანი იყო, პულსი უკვე არ ესინჯებოდა. მიწის გამო მომიკლა შვილი, ეს რა გამიკეთა... სახელმწიფო ტერიტორია იყო, საერთო გზა გადიოდა ჩვენს ნაკვეთებს შორის. რა მეშველება მეორე შვილი დავკარგე..." - განაცხადა მოკლულის მამამ.

გარდაცვლილის მეზობელი მომხდარის შესახებ ჰყვება:

"ტერიტორიაზე ჰქონდათ დავა, ნუ დადიხარ, აქ ჩემი ტერიტორიააო. ბექას დიდი მანქანა ჰქონდა, შემოდიოდა ხოლმე და თივას დებდა იმ ადგილას, რომელზეც მეზობელი ეუბნებოდა, რომ ჩემი ტერიტორიააო. ბოლოს გაუბა ღობე, რათა არ გადასულიყო იქეთ მხარეს. მოვიდა ბექა და ღობის გახსნას აპირებდა, რომ გასულიყო და თივა დაედო. ეს კაცი ჩასაფრებული ყოფილა. ამოიღო თოფი და ესროლა. ბექამ ცოტა მანძილი ფეხით გაიარა თავისი სახლისკენ და შემდეგ გონება დაკარგა. მამამისსაც გაუგონია სროლის ხმა და გამოსულა გარეთ ამ ხმაზე. მკვლელს მიმალვა არ უცდია, დაკავებულია..." - აცხადებს მეზობელი.

სოსო სიბაშვილი, სოფელ ვეჯინის მკვიდრი:

"ვფიქრობ, რომ წინასწარ ჰონდა განზრახული ამის გაკეთება. იჩხუბეს თუ არა მანამდე, არ ვიცი, მაგრამ თქვეს, რომ როცა მოკლა, შემდეგ კარგა ხანს თავის კართან იდგა თოფითო. არ ვიცი, კიდევ ვინმეს მოკვლას აპირებდა თუ რა იყო".

მომხდარზე მიმდინარეობს გამოძიება.