"პუტინი პრეზიდენტობისთვის ზედმეტად სანდო და კეთილია - დაკავებული იგორ სტრელკოვი რუსეთის საპრეზიდენტო არჩევნებში მონაწილეობას გეგმავს
დონეცკის ე.წ. სახალხო რესპუბლიკის ყოფილი თავდაცვის მინისტრი, იგორ გირკინ-სტრელკოვი, რომელიც ამჟამად პატიმრობაშია, აპირებს, რომ 2024 წლის რუსეთის საპრეზიდენტო არჩევნებში მიიღოს მონაწილეობა.
სტრელკოვმა თავისი გადაწყვეტილება იმით ახსნა, რომ თავს რუსეთის ამჟამინდელ პრეზიდენტზე, ვლადიმერ პუტინზე უკეთესად მიიჩნევს. მისივე თქმით, პუტინი პრეზიდენტობისთვის ზედმეტად "სანდო და კეთილია“.
სტრელკოვის განცხადებით, იგი სამხედრო საქმეებში უფრო კომპეტენტური იქნება.
შეგახსენებთ, რომ იგორ სტრელკოვი 2023 წლის ივნისში, ექსტრემიზმის ბრალდებით დააკავეს. იგი წინასწარი დაკავების იზოლატორში სექტემბრის ბოლომდე დარჩება. სტრელკოვს ხუთ წლამდე ვადით თავისუფლების აღკვეთა ემუქრება. გამამტყუნებელი განაჩენის გამოტანის შემთხვევაში, საპრეზიდენტო არჩევნებში მონაწილეობის მიღებას ვერ შეძლებს.
- აღსანიშნავია, რომ 2022 წლის ნოემბერში სტრელკოვს ჰააგის სასამართლომ დაუსწრებლად მიუსაჯა სამუდამო პატიმრობა. მას 2014 წელს, დონბასში, მალაიზიური ავიახაზების სამგზავრო თვითმფრინავის ჩამოგდებაში მონაწილეობა ედებოდა ბრალად. ავარიის შედეგად 298 ადამიანი დაიღუპა. სტრელკოვი სასამართლო პროცესს არ დასწრებია და ბრალს დღემდე უარყოფს.
ნახეთ ასევე: