იდუმალი ჯარისკაცი და "სიკვდილის მანქანა" - ვინ იყო დმიტრი უტკინი, რომელიც ავიაკატასტროფისას დაღუპულთა სიაშია და რა ბედი ელის მეთაურების გარეშე დარჩენილ "ვაგნერს"
23 აგვისტოს გავრცელდა ინფორმაცია, რომ ტვერის ოლქში "ვაგნერის“ მფლობელის ბიზნეს-ჯეტი ჩამოვარდა. ბორტზე 10 ადამიანი, მათ შორის ეკიპაჟის 3 წევრი და 7 მგზავრი იმყოფებოდა. ავიაკატასტროფის შედეგად ათივე გარდაიცვალა.
"როსავიაციის" ინფორმაციით, ბორტზე თვითმფრინავის მფლობელი, ევგენი პრიგოჟინიც იმყოფებოდა. მოგვიანებით მგზავრების სრული სია გამოქვეყნდა, რომლის მიხედვითაც ავიაკატასტროფის დროს ბორტზე"ვაგნერის“ სულის ჩამდგმელი, დმიტრი უტკინი და ორგანიზაციის სამხედრო ლოჯისტიის გენიოსი ვალერი ჩეკალოვიც იმყოფებოდნენ.
- ვინ იყო დმიტრი უტკინი?
დმიტრი უტკინი - იდუმალებით მოცული, უაღრესად გამოცდილი ჯარისკაცი იყო და იმ ადამიანების რიგს მიეკუთვნებოდა, რომლებსაც ჩრდილში, შეუმჩნევლად ყოფნა ხიბლავთ. ამ "სიკვდილის მანქანას", ევგენი პრიგოჟინი "მსოფლიო ომების ისტორიაში ყველა დროის საუკეთესო მეომარს" უწოდებდა.
იყო თუ არა ასე, ეს სადავო საკითხია, თუმცა უტკინის საომარი გამოცდილება ნამდვილად კოლოსალურია. თანამედროვე რუსეთის ისტორიაში, მან თითქმის ყველა ომში მიიღო მონაწილეობა (2008 წელს, აგვისტოს ომში არ უომია): ჩეჩნეთში, 2014 წელს სირიაში, დონბასის ომებში და 2022 წლიდან "ვაგნერის“ ეგიდით უკრაინის სხვადასხვა მიმართულებებზე იბრძოდა.
2014 წელს როსტოვში დმიტრი უტკინი ვეტერან - ინსტრუქტორებთან ერთად აარსებს სამხედროების მომზადების ცენტრს.
გავრცელებული ვერსიებით, უტკინის საძახისი, რომელიც მესამე რეიხის რომანტიზებაში იყო შემჩნეული, "ვაგნერი" გახლდათ. ვაგნერი კი ჰიტლერის საყვარელი კომპოზიტორი იყო. სწორედ აქედან, სავარჯიშო-საწვრთნელ ცენტრს პირობითად “ვაგნერი” ეწოდა. უტკინი ამ ცენტრის ხელმძღვანელი იყო. მფლობელი - პრიგოჟინი. ანუ სამხედრო შემადგენელზე დმიტრი აგებდა პასუხს, ფინანსურ-მენეჯმენტზე - პრიგოჟინი.
ბიზნესმენი არც უარყოფდა, რომ მისი სამხედრო კომპანიის იდეოლოგი ნაცისტური გერმანიის მოტრფიალე იყო. რუსეთის უკრაინაში შეჭრის პერიოდში ჟურნალისტებმა მას "დმიტრის ვნებანზე" ჰკითხეს, რაზეც პრიგოჟინმა უპასუხა, რომ "მტრის იდეოლოგია ჯერ თავად უნდა შეიგრძნო, რომ მტერს უკეთ ეომო". ამაში კი პრიგოჟინი გულისხმობდა, რომ მისი აზრით, უკრაინელებიც "ნაცისტები“ იყვნენ და უტკინი ცდილობდა, უბრალოდ, უკეთ ჩაწვდომოდა მათ ბუნებას.
ჯერ კიდევ ომამდე ცნობილი იყო, რომ უტკინს სხეულზე ნაცისტური გერმანიის სიმბოლოები ჰქონდა ამოსვირინგებული.
სიკვდილის არასდროს ეშინოდა და ფილოსოფიურად უდგებოდა. მაგალითად, სიმიონ პეგოვთან ინტერვიუში, როდესაც პრიგოჟინი და სიმიონი სიკვდილზე საუბრობდნენ, დიალოგში უტკინიც ჩაერთო. ის კადრში არ ჩანდა და გამოჩენა არ ისურვა, უბრალოდ, ჩაილაპარაკა, რომ "სიკვდილი რაღაც ახლის დასაწყისი“ იყო. პრიგოჟინს იდეა მოეწონა და მის მარჯვენა ხელს დაეთანხმა.
ზოგადად, უტკინი ფარული ცხოვრების ისეთი მოყვარული იყო, რომ მასზე ინტერნეტ-სივრცეში მწირი ინფორმაციაა. ერთადერთი, რაზეც ყველა თანხმდებოდა, არის ის, რომ გამორჩეული მებრძოლი და ხელმძღვანელი იყო. მას არ უყვარდა ინტერვიუების მიცემა, კამერაში გამოჩენა. მისი მეტ-ნაკლებად ყველაზე ცნობილი ორი სურათია, სელფი და პუტინთან, კრემლში გადაღებული ფოტო. მაშინ "ვაგნერის“ მეთაურები სირიაში წარმატების შემდეგ მიიწვიეს და დააჯილდოვეს, ერთ-ერთი კი უტკინი იყო.
- რა იქნება შემდეგ?
24 აგვისტოს საღამოსთვის, ჯერ არ არის ოფიციალურად დადასტურებული, რომ გარდაცვლილები პრიგოჟინი, უტკინი და ჩეკალოვი არიან. ადამიანები ამ სახელებითა და გვარებით რეისზე მყოფთა სიაში წერია, თუმცა ექსპერტიზის პასუხები ჯერ ცნობილი არ არის. მიმდინარეობს გამოძიება და შესაბამისი სამუშაოები. თუკი ინფორმაცია დადასტურდება, გამოდის, რომ "ვაგნერის“ მთავარი დამფინანსებელი, იდეოლოგი და ლოჯისტიკა-მომარაგების სპეციალისტი ავიაკატასტროფაში დაიღუპნენ.
რაც, რა თქმა უნდა, ორგანიზაციისთვის უზარმაზარი დარტყმაა. მეორე მხრივ, კომპანიაში ათასობით მებრძოლი, სამხედრო ტექნიკა, გამოცდილება და რაც მთავარია, სხვადასხვა სახელმწიფოებთან დადებული მოქმედი კონტრაქტებია.
ამჟამად "ვაგნერი“ მუშაობს ბურკინა-ფასოში, მალიში, სუდანსა და ლიბიაში. ასევე არიან, ცენტრალური აფრიკის რესპუბლიკაში, სადაც სამხედრო მისიასთან ერთად ბუნებრივი რესურსების სადაზვერვო-მოპოვების ლიცენზია აქვთ.
შემდგომი მუშაობისთვის ყველაზე რეალურ ქვეყანად ნიგერი განიხილებოდა, სადაც სამხედრო გადატრიალება მოხდა. ქვეყნის ახალ ლიდერებს საფრანგეთისა და აშშ-ის სამხედრო ძალებთან თანამშრომლობა არ სურდათ და რუსეთთან ურთიერთობის გაუმჯობესებას ითხოვდნენ.
21 აგვისტოს პრიგოჟინის ვიდეო აფრიკიდან გავრცელდა. ექსპერტების ვარაუდით, ის მალიში იყო გადაღებული. სავარაუდოდ, "ვაგნერი“ ნიგერში შესვლისთვის ემზადებოდა.
ახლა კერძო სამხედრო ორგანიზაცია დაქსაქსულია. ნაწილი აფრიკის ქვეყნებში, ნაწილი ბელარუსში ბელარუსის შეიარაღებულ ძალებს წვრთნის, ხოლო ნაწილიც შვებულებას ატარებს. უცნობია, როგორ განვითარდება "ვაგნერის“ ბედი.
გუშინ ტელეგრამ-არხებში ვრცელდებოდა ინფორმაცია, რომ კომპანიაში არსებობს პროტოკოლი, თუ როგორ უნდა მოიქცნენ მეთაურები და თანამშრომლები, თუკი მათი ლიდერი დაიღუპება. მაგრამ ახლა დაუდასტურებული ინფორმაციით, ლიდერი კი არა, ყველა მთავარი ლიდერი დაიღუპა, შესაბამისად, რაღაც პერიოდი კოორდინაციისთვის დასჭირდებათ. დღემდე ოფიციალური განცხადება "ვაგნერს“ ან პრიგოჟინის კონკორდ ჯგუფს არ გაუკეთებია.
გუშინ პეტერბურგში, სათაო ოფისის კედელზე თანამშრომლებმა ჯვარი გამოსახეს. ჯერჯერობით, ეს იყო მათი რეაქცია.
- ნახეთ ასევე:
- სასიკვდილო ბორტი RA-02795 - რა ვერსიები ვრცელდება ავიაკატასტროფაზე, რომლის დროსაც პრიგოჟინთან ერთად, "ვაგნერის" ლამის მთელი სამეთაურო ჯგუფი დაიღუპა
- "პრიგოჟინი რთული ბედის, მაგრამ ნიჭიერი კაცი იყო" - პუტინი ტვერში მომხდარი ავიაკატასტროფისას დაღუპულთა ოჯახებს "გულწრფელად უსამძიმრებს"
ავტორი: ანრი კურტანიძე