"ერთ-ერთი მთავარი სტრატეგიული მიზეზი იმისა, თუ რატომ ითვისებენ რუსები არა ქაოსურად, არამედ მიზანმიმართულად ბათუმს, ის გახლავთ, რომ..." - ექსპერტები საქართველოში რუსების მასშტაბურ შემოსვლაზე
"მიმაჩნია, რომ მკვეთრად უნდა შეიზღუდოს ქვეყანაში რუსების შემოსვლა. თბილისში ეგენი დიდად ვერ ხარობენ, აქ აშკარად კუდი აქვთ მოჭრილი, მაგრამ ბათუმში საშინელება ხდება", - თქვა ამ ცოტა ხნის წინა გაზეთ "კვირის პალიტრასთან" ინტერვიუში ექსპერტმა სანდრო თვალჭრელიძემ.
"ბათუმში ახლახან ვიყავი და გული გამისკდა იმით, რაც იქ ვნახე, თან ისეთი შთაბეჭდილება მრჩება, რომ კანონი რუსეთის მოქალაქეების მიმართ უფრო შემწყნარებელია, ვიდრე საქართველოს მოქალაქეებისადმი.
ჩვენ თავისუფალი ქვეყანა ვართ, არ შეგვიძლია სრულად შევზღუდოთ მათი შემოსვლა, მაგრამ საზღვარზე უნდა დაწესდეს ძალიან მკაცრი კონტროლი. ვიღაცები არ უნდა შემოუშვან და რაც მთავარია, საქართველოში კანონი რუსების მიმართ სრული სიმკაცრით უნდა აღსრულდეს.
ვგულისხმობ იმას, რომ ბევრი კონფლიქტი ხდება საქართველოს და რუსეთის მოქალაქეებს შორის. მაგალითად, შესახლდებიან სახლში, არ უხდიან ფულს მეპატრონეს და არც ბინას ცლიან. პოლიცია მათ არ ასახლებს, მაშინ, როდესაც ლტოლვილებს ხშირად 24 საათში უბინაოდ ტოვებენ ხოლმე. რუსებმა საქართველოში უნდა იგრძნონ, რომ არაკეთილმოსურნე ქვეყნის ტერიტორიაზე არიან. თბილისში ამას გრძნობენ, თუმცა მიკვირს რიგი ქართველების, მათ შორის აჭარლების, ასე რომ უხარიათ მათი ჩამოსვლა და ამბობენ, ისინი უფრო ბევრ ფულს ხარჯავენ, ვიდრე ქართველებიო. ასე ფიქრი და მოქცევა ჩემთვის ყოვლად მიუღებელია. ამგვარმა მიდგომამ შეიძლება დაგვღუპოს", - ამბობს თვალჭრელიძე ინტერვიუში.
ამავე თემაზე სოციალურ ქსელში წერს პოლიტოლოგი გია ხუხაშვილი:
"ერთ-ერთი მთავარი სტრატეგიული მიზეზი იმისა, თუ რატომ ითვისებენ რუსები არა ქაოსურად, არამედ მიზანმიმართულად ბათუმს, ის გახლავთ, რომ ეს ქალაქი არის ნატოს საზღვარზე და თუ რუსების კრიტიკული რაოდენობა დასახლდა, სწორედ იქ გაატაროს იმპერიამ გრძელვადიანი გლობალური დაპირისპირების საზღვარი. ომი რომ არ უნდა და ვითომ ნატო რომ უნდა, სპეციალურად იმ ხალხისთვის…"