"მივეცი უფლება მოეპოვებინათ კადრები, თუ როგორ ტოვებენ ჩემი შვილები სასტუმროს" - კალაძე უარყოფს, რომ მისმა ოჯახმა სტიქიის ზონა სახელმწიფო ვერტმფრენით დატოვა
თბილისის მერი კახა კალაძე ტყუილს უწოდებს გავრცელებულ ინფორმაციას, რომ მისმა ოჯახმა სტიქიის ზონიდან გამოსასვლელად სახელმწიფო ვერტმფრენი გამოიყენა. როგორც მან დედაქალაქის მთავრობის სხდომაზე განაცხადა, მისმა მცირეწლოვანმა შვილებმა "სანსეტ შოვი" ავტომობილით დატოვეს და ამის ამსახველი კადრებიც არსებობს.
"გავრცელდა ინფორმაცია, რომ თითქოს მე გამოვიყენე სახელმწიფო ვერტმფრენი და მისი საშუალებით გამოვიყვანე სტიქიის ზონიდან. ეს არის ტყუილი. მიზანმიმართულად გავრცელდა ინფორმაცია. ამ საკითხზე მე მომმართა ტელეკომპანია "იმედმა", რომ მიმეცა უფლება მათ მოეპოვებინათ ვიდეოკამერების ჩანაწერები, თუ როგორ გამოდიან სასტუმროდან ჩემი მცირეწლოვანი შვილები. მე მივეცი თანხმობა. საზოგადოებამ სიმართლე თავად იხილა და ნახა რისი მკადრებელია ზოგიერთი მედიასაშუალება და პოლიტიკოსი. აქვე უნდა აღვნიშნე რომ იყვნენ ისეთები, ვინც აღნიშნული ბოროტება დაგმო. იყო უამრავი ჟურნალისტი, რომელიც ოპოზიციურ ტელეარხებში მუშაობს და არ წყდებოდა ზარები მათგან, რომ ეს იყო დიდი სიბინძურე. მადლობა მათ ამ პოზიციისთვის.
ცნობისთვის, შოვში დატრიალებული სტიქიის დროს ცნობილი გახდა, რომ სასტუმრო "სანსეტ შოვი" დედაქალაქის მერის, კახა კალაძის ოჯახმა სტიქიის დაწყებამდე რამდენიმე საათით ადრე დატოვა.
სასტუმროს მმართველი კომპანიის წარმომადგენლის ანა მურადაშვილის თქმით, თბილისის მერის ოჯახმა სასტუმრო გუშინ, საკუთარი ავტომობილით დატოვა.