"ჩემთვის ყველაზე ბედნიერ დღეს მედგა ეს მაგარი კაცი გვერდში" - რას იხსენებს ოთო ნემსაძე სტიქიისას გარდაცვლილ გიორგი ყარალაშვილზე?
შოვში სტიქიისას დაკარგული და-ძმიდან გიორგი ყარალაშვილის ცხედარი ამოიცნეს, ხოლო სოფიოს ამ დრომდე ეძებენ. გიორგის გარდაცვალების შესახებ ინფორმაციას მისი ახლობლები ადასტურებენ. გიორგი საკმაოდ აქტიური ახალგაზრდა იყო. როგორც ცნობილია, ის სორბონას უნივერისტეტში აპირებდა სწავლის გაგრძელებას.
მის შესახებ უამრავი ადამიანი წერს სოციალურ ქსელში, მათ შორის არის ოთო ნემსაძე.
"ჩემთვის ყველაზე ბედნიერ დღეს მედგა ეს მაგარი კაცი გვერდში, დილის 8 საათიდან წვიმაში ხატავდა ჩემი და სოფოს სტენსილს….ძალიან მაგარი ბიჭი წაგვართვა უბედურებამ, მშვიდად განისვენე მეგობარო, მადლობა საჩუქრისთვის" - წერს ოთო ნემსაძე.
ცნობისთვის, 3 აგვისტოს რაჭაში, შოვში უდიდესი ტრაგედია მოხდა. იმ ადგილის მიმდებარედ, სადაც სასტუმრო "სანსეთ შოვი" და კოტეჯებია განთავსებული, მეწყერი ჩამოწვა. ადგილზე ათობით დამსვენებელი იმყოფებოდა.
ბოლო ინფორმაციით, მეწყერს 19 ადამიანი ემსხვერპლა. მაშველები 20-ზე მეტ დაკარგულს ეძებენ.