დაკარგული ადამიანების ოჯახის წევრები სტიქიის ზონაში იმყოფებოდნენ - უახლესი კადრები შოვიდან

შოვში, დაკარგული ადამიანების ოჯახის წევრები სტიქიის ზონაში იმყოფებოდნენ. მათთან ერთად საგანგებო სიტუაციების მართვის სამსახურის უფროსი თემურ მღებრიშვილი და სამაშველო სამსახურის თანამშრომლები იმყოფებოდნენ. მათ სტიქიის ზონა ცოტა ხნის წინ უკომენტაროდ დატოვეს.

სტიქიის ზონაში სამაშველო ღონისძიებები დილიდან განახლდა. ადგილზე მუშაობს ავიაცია. სტიქიის შედეგების სალიკვიდაციო სამუშაოებში ჩართულია თავდაცვის ძალები.

თავდაცვის მინისტრი ჯუანშერ ბურჭულაძე თავდაცვის ძალების მეთაურთან, გენერალ-მაიორ გიორგი მათიაშვილთან და თავდაცვის ძალების სხვა ხელმძღვანელ პირებთან ერთად გვიან ღამემდე იმყოფებოდა სტიქიის ზონაში.

"შემუშავდა სპეციალური გეგმა, რომლის მიხედვითაც საბრძოლო-საინჟინრო ბატალიონის სამხედროები სტიქიის ზონაში რამდენიმე გასაშლელ ხიდს მოაწყობენ. თავდაცვის მინისტრთან ერთად სტიქიის ეპიცენტრში იმყოფებოდნენ რეგიონალური განვითარებისა და ინფრასტრუქტურის მინისტრი ირაკლი ქარსელაძე და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური უზრუნველყოფის მინისტრი ზურა აზარაშვილი“, - ნათქვამია ინფორმაციაში.

შოვში მეწყერი 3 აგვისტოს ჩამოწვა. სტიქიის ზონიდან, ამ დროისთვის, 210 ადამიანია გამოყვანილი, გარდაცვლილია 11 პირი. შოვში მომხდარი ტრაგედიის გამო, 7 აგვისტო გლოვის დღედ გამოცხადდა.

ვიდეოკადრები: ვანო მაზმიშვილი