"საქმე გვაქვს რუსეთისგან კარგად დაგეგმილ ჰიბრიდულ ომთან" - რა შედეგი შეიძლება მოჰყვეს რუსებისთვის დისკომფორტის შექმნის პოლიტიკას? ექსპერტი ბათუმის აქციების მნიშვნელობაზე
დღეს დილით დიდი ხმაური და საპროტესტო აქცია მოჰყვა ბათუმის პორტში სოჭიდან წამოსული საკრუიზო ლაინერ „ასტორია გრანდეს“ შემოსვლას, რომლის მგზავრებიც, როგორც ირკვევა, პუტინისტი მომღერლები და პროპაგანდისტები არიან. პორტთან აქცია გამართეს რიგითმა მოქალაქეებმა და ოპოზიციური პარტიის წარმომადგენლებმა. აქციას დაპირისპირება მოჰყვა საქართველოსა და ბათუმში დამკვიდრებულ ოკუპანტ რუსეთის მოქალაქეებს შორის, რომლებმაც ქართველებს ქვები დაუშინეს.
როგორც ევროპულ-ქართული ინსტიტუტის ხელმძღვანელი გიორგი მელაშვილი ამბობს, საქმე გვაქვს რუსეთის მხრიდან გრძელვადიან და კარგად დაგეგმილ ჰიბრიდულ ომთან, რომლის უმნიშვნელოვანესი კომპონენტია ჯერ ეკონომიკური, შემდგომ კი კულტურული ექსპანსია.
"რასაც ჩვენ ამ ბოლო დროის განმავლობაში ვხედავთ, ეს არის რუსეთის მხრიდან გრძელვადიანი და კარგად დაგეგმილი ჰიბრიდული ომის ნაწილი. ჰიბრიდული ომის უმნიშვნელოვანესი კომპონენტია ეკონომიკური ექსპანსია, რომელსაც მოსდევს უკვე კულტურული ექსპანსია. ეკონომიკური ექსპანსია გამოიხატება იმაში, რომ საქართველოში შემოვიდა უზარმაზარი რუსული კაპიტალი, ამის სიმპტომებია იგივე რაჭის ტყეების გაყიდვა, თბილისში მომრავლებული პატარ-პატარა რუსული ბიზნესები და სხვა მრავალი ასეთი ქმედება. ამ ყველაფერს უკვე ემატება კულტურული ექსპანსია - რუსი მომღერლების ჩამოსვლა, რუსეთში მოღვაწე ეთნიკურად ქართველი, მაგრამ სრულიად გარუსებული მომღერლების გამოყენება და ისევ და ისევ მცდელობა იმისა, რომ დაგვაბრუნონ იმ რუსულ ეკონომიკურ, კულტურულ და პოლიტიკურ სივრცეში, საიდანაც გამოსვლა ჩვენი მოსახლეობის აბსოლუტურ უმრავლესობას უნდა.
იცით, რომ ვიბრძოდით ჯერ კიდევ 90-იანი წლებში აფხაზეთში, მერე - ცხინვალში და ა.შ. რუსეთი ცდილობს, რომ შეინარჩუნოს საკუთარი იმპერია და ახლა იმის გათვალისწინებით, რომ უკრაინაში მათი სამხედრო შესაძლებლობებიდან გამომდინარე ფიზიკურად არ შეუძლიათ სხვა ასეთი სამხედრო ოპერაციების განხორციელება, ცდილობენ საქართველოში ეს ეკონომიკური ბერკეტებით გააკეთონ. ყველაზე სამწუხარო ის არის, რომ საქართველოს მთავრობა ამ ყველაფერს უქმნის ძალზე კეთილგანწყობილ გარემოს. საკუთრივ რუსეთის მხრიდან ასეთი ოპერაციის განხორციელება შეუძლებელი იქნებოდა ქართული სახელმწიფოს მხრიდან სათანადო ბერკეტების ამოქმედებით. არაერთხელ გვისაუბრია იმაზე, რომ შესაძლებელია სავიზო რეჟიმის დაწესება, ან უბრალოდ, საქართველოში რუსი ტურისტების ყოფნის პერიოდულობის შემცირება.
ამას ემატება ისიც, რომ ბათუმის შსს-მ რუსი ტურისტების დასაცავად უზარმაზარი საპოლიციო დანაყოფი გამოიყვანა. ასეთი ტიპის აქტიურობა არ გვახსოვს მაშინ, როცა საქმე ეხებოდა რომელიმე სხვა გამოხატვის მცდელობას. ანუ, ფაქტობრივად, გამოდის ის, რომ ქართული პოლიცია იცავს რუს ტურისტებს საქართველოს მოქალაქეებისგან და თუ საქართველოს მოქალაქეების ნება ასეთი აშკარად მკვეთრია, მაშინ ისმის კითხვა - ვის სამსახურში დგანან ის პოლიციელები, რომლებიც ეწინააღმდეგებიან ქართველი ერის ნებას? ფაქტობრივად გამოდის, რომ ის ადამიანები, ვინც ქართველი ერის ნებას ეწინააღმდეგებიან, ნებსით, თუ უნებლიედ (ამას არც აქვს დიდი მნიშვნელობა), რუსეთის სამსახურში არიან".
- ისმის კითხვა - როგორ დავუპირისპირდეთ სახიფათო გამოწვევას. ხელისუფლების მიერ სავიზო რეჟიმის დაწესების გარდა, ექსპერტი საზოგადოების როლზეც ამახვილებს ყურადღებას და აღნიშნავს, რომ უპირველეს ყოვლისა, საზოგადოება არ უნდა დანებდეს და მან უნდა გააგრძელოს მაქსიმალური დისკომფორტის პოლიტიკა, როგორსაც ის ახლა ახორციელებს.
"პირველ რიგში, ბრძოლას ყოველთვის აქვს აზრი. ჩვენ დავინახეთ, რომ იმ კომპანიას, რომელმაც ეს ხომალდი საქართველოში შემოიყვანა, მოუწია ბათუმის ამოღება სამომავლოდ დაგეგმილი კრუიზებიდან. ეს ალბათ არის საქართველოს ყველა მოქალაქის ინდივიდუალური პასუხისმგებლობა - შევუქმნათ მაქსიმალური დისკომფორტი რუსეთის მოქალაქეებს, რომლებიც საქართველოში ჩამოდიან არა დასასვენებლად, არამედ, ეკონომიკური ექსპანსიის მიზნით. ისევ და ისევ სწრაფი და ეფექტიანი გამოსავალია სავიზო რეჟიმის დაწესება, რომელსაც შეუძლია არსებულ გამოწვევაზე სათანადო პასუხის გაცემა. სავიზო რეჟიმი გულისხმობს იმას, რომ შემცირდეს ნებადართული დროის რაოდენობა, რომლის გატარებაც რუსეთის მოქალაქეებს შეუძლიათ საქართველოში. ამას ემატება ისიც, რომ რა თქმა უნდა, ადამიანს თუ ამოეწურება ვადა, ის ვალდებულია დაბრუნდეს საკუთარ სამშობლოში, ან მოითხოვოს დროებითი ბინადრობის მოწმობა.
ბინადრობის მოწმობის გაცემის გამკაცრება ასევე საქართველოს მთავრობის უფლებამოსილებაა. ამის შესრულება არც ისე რთულია, ეს არის პასუხისმგებლიანი სახელმწიფოს მიგრაციის პოლიტიკის ბაზისი. ეს იმდენად ელემენტარული საკითხია, რომ ერთადერთი, რაც ამის განსახორციელებლად აუცილებელია, არის პოლიტიკური ნება. სამწუხაროდ, „ქართული ოცნების“ მხრიდან ვხედავთ ამ პოლიტიკური ნების არარსებობას. ჩვენ კარგად ვხედავთ, რომ რუსეთი ცდილობს უკრაინის დაპყრობას, მაგრამ ჯერჯერობით, დიდად წარმატებული არ არის და უკრაინელები იბრძვიან ამის წინააღმდეგ. განსხვავება აქ არის ის, რომ საქართველო თითქოს უბრძოლველად თმობს ყველაფერს და რუსეთის წინაშე კაპიტულაციას აცხადებს იმ დროს, როდესაც სამხედრო აგრესიის ისეთი საფრთხე, როგორც უკრაინაშია, საქართველოში არ არსებობს. გამოსავალი ისაა, რომ უპირველეს ყოვლისა, საზოგადოება არ უნდა დანებდეს და მან უნდა გააგრძელოს მაქსიმალური დისკომფორტის პოლიტიკა, როგორსაც ის ახლა ახორციელებს.
ამ დისკომფორტის პოლიტიკის ფარგლებში, რომელსაც საზოგადოება ავლენს (და არა - სახელმწიფო, სამწუხაროდ), გარკვეული წარმატებები უკვე აშკარაა და აუცილებელია, რომ ყველამ გაიაზროს პასუხისმგებლობა საკუთარი სამშობლოს წინაშე, რომ არ დავუშვათ მორიგი გარუსება. კობახიძისთვის, რომელმაც ამ პროცესს ქაჯობა უწოდა, ყველაზე კარგი პასუხია სალომე ზურაბიშვილის სიტყვები: ქაჯებმა ერთხელ და სამუდამოდ უნდა დატოვონ საქართველო. ჩვენ დღეს ნამდვილად შეგვიძლია ვთქვათ, რომ ე.წ. არგაღიზიანების პოლიტიკა თავისი არსით იყო უაღრესად წარუმატებელი და, რეალურად, კაპიტულაციის პოლიტიკაში გადაიზარდა. ამ პოლიტიკამ არ გადაგვარჩინა არც მცოცავი ოკუპაციისგან, რომელიც გააქტიურებულია ცხინვალის რეგიონში, არც მკვლელობებისგან და გატაცებებისგან, რომელსაც ჩვენ ვხედავთ როგორც აფხაზეთის საოკუპაციო ხაზთან, ასევე ცხინვალთან და ყველაზე მნიშვნელოვანი - ამ პოლიტიკამ არ დაგვიცვა იმ ეკონომიკური ექსპანსიისგან, რომელსაც ყოველდღიურ რეჟიმში ვხედავთ. ანუ, ფაქტობრივად, ხელი შეუწყო იმ დიდრუსობას, რომელსაც ახლა ვაკვირდებით“.
წაიკითხეთ ასევე: