ლებრონ ჯეიმსის 18 წლის ვაჟს ვარჯიშისას გული გაუჩერდა - როგორია ამჟამად ახალგაზრდა კალათბურთელის მდგომაროება

NBA-ს ვარსკვლავის, ლებრონ ჯეიმსის უფროს ვაჟს, სამხრეთ კალიფორნიის უნივერსიტეტში კალათბურთის ვარჯიშის დროს, გული გაუჩერდა.

ბრონი ჯეიმსს პირველადი დახმარება ადგილზევე აღმოუჩინეს და საავადმყოფოში გადაიყვანეს. ოჯახის წარმომადგენლის განცხადებაში ნათვამია, რომ 18 წლის მოთამაშის მდგომარეობა უკვე სტაბილურია და ის რეანიმაციაში აღარ იმყოფება.

"ბრონი ჯეიმსს თამაშისას მოულოდნელად გული გაუჩერდა. მას სამედიცინო პერსონალმა პირველადი დახმარება აღმოუჩინა და საავადმყოფოში გადაიყვანა. მისი მდგომარეობა ამჟამად სტაბილურია. ჯეიმსების ოჯახის მიმართ პატივისცემას და კონფიდენციალურობის დაცვას ვითხოვთ.

ლებრონი და სავანა სპორტსმენების უსაფრთხოების დასაცავად გაწეული სამსახურისთვის USC-ის სამედიცინო და სპორტულ პერსონალს მადლობას უხდიან",- ნათქვამია განცხადებაში.

18 წლის ბრონი USC-ის კალათბურთის გუნდში თამაშობს. ასაკის მიუხედავად, ის უკვე ქვეყნის საუკეთესო 18-წლამდე ასაკის კალათბურთელს შორის სახელდება. USC-ის გუნდში ჩარიცხვის შემდეგ, ლებრონმა ვაჟს "ინსტაგრამზე" მიულოცა: "ძალიან ვამაყობ შენით, პატარავ! სიტყვები არ მყოფნის. მხოლოდ იმას გეტყვი, რომ მიყვარხარ."

NBA-ს ოთხგზის ჩემპიონმა თქვა, რომ მისი ერთ-ერთი საბოლოო მიზანია, ლიგაში ბრონისთან ერთად ითამაშოს. მის 18 წლის ვაჟს NBA-ში თამაშის უფლება მომავალ წელს ექნება. 38 წლის კალათბურთელი ამბობდა: "ბოლო წელს შვილთან ერთად ვითამაშებ. სადაც ბრონი იქნება, მეც იქ ვიქნები. ყველაფერს გავაკეთებ, რომ 1 წელი ჩემს შვილთან ერთად ვითამაშო. აქ ფული არაფერ შუაშია".

ცნობისთვის, გულის უეცარი გაჩერების პირდაპირი გამომწვევი მიზეზი ძირითადად გულის რითმის რაიმე სახის დარღვევაა. თუ ასეთ დროს ადამიანს დახმარებას დაუყოვნებლივ არ აღმოუჩენენ, შესაძლოა, ყველაფერი ფატალურად დასრულდეს. გულის უეცარი გაჩერება ახალგაზრდა სპორტსმენებს შორის იშვიათია, თუმცა მსგავსი შემთხვევები მაინც ხდება. 2011 წლის კვლევის შედეგად დადგინდა, რომ ამ მიზეზით წელიწადში 9 სპორტსმენი იღუპება.

წყარო: cnn

მოამზადა: ანა სიბოშვილმა