ვმასპინძლობთ გურიას – "ქართული კუთხეების ფესტივალი" წისქვილში

„ქართული კუთხეების ფესტივალი“ წისქვილის ეზოში გურიის დღეებით გაგრძელდება. გურიის წარმომადგენლები თავიანთ კუთხეს სტუმრებს 15 და 16 ივლისს წარუდგენენ.

წისქვილის ეზოში დამსწრე საზოგადოებისთვის ფოლკლორულ და ქორეოგრაფიულ ნიმუშებს ანსამბლები „სახიობა“, „ლაზიერი“ და „სამება“ შეასრულებენ.

სტუმრები დააგემოვნებენ გამორჩეულ გურულ კერძებს და შეფ-მზარეულებთან ერთად მათ მომზადებასაც ისწავლიან. ასევე, მათ ექნებათ შესაძლებლობა წისქვილი ეზოში მოწყობილ გამოფენა-გაყიდვაზე დაათვალიერონ და შეიძინონ გურიიდან ჩამოტანილი და ადგილობრივი კომპანიების მიერ წარმოებული პროდუქცია. ბავშვებს კი დახვდებათ სპეციალური სივრცე, სადაც შეძლებენ თავი მრავალფეროვანი გასართობითა და აქტივობებით შეიქციონ.

შეგახსენებთ, რომ „ქართული კუთხეების ფესტივალი“ „წისქვილი ჯგუფის“ ახალი ინიციატივაა, რომელიც მიზნად ქართული კულტურისა და გასტრონომიის პოპულარიზაციას ისახავს. ფესტივალი სტუმრებს შესაძლებლობას აძლევს საქართველოს სხვადასხვა რეგიონში თბილისიდან გაუსვლელად იმოგზაურონ. „ქართული კუთხეების ფესტივალის“ ფარგლებში, წისქვილმა უკვე უმასპინძლა იმერეთს, სვანეთს, კახეთს, სამეგრელოსა და რაჭას. გურიის შემდეგ კი, ივლისის ბოლო შაბათ-კვირას სტუმრების წინაშე აჭარა წარდგება.

გაითვალისწინეთ, ღონისძიებაზე დასწრება თავისუფალია. მეტი დეტალის სანახავად ესტუმრეთ „წისქვილის“ ფეისბუქ გვერდს ან გადადით ღონისძიების ბმულზე.

NS