"ეს იყო ტექნიკური გაუგებრობა, რომელიც ოპერატიულად აღმოიფხვრა" - ნათია კუკულაძე "საერთაშორისო გამჭვირვალობა - საქართველოს“ კვლევას ეხმაურება

კომუნიკაციების კომისიის წევრი ნათია კუკულაძე ეხმაურება არასამთავრობო ორგანიზაციის "საერთაშორისო გამჭვირვალობა - საქართველოს“ კვლევას, რომლის თანახმადაც, კუკულაძე დეკლარაციაში ხელფასს, 5 უძრავ ქონებასა და მეუღლის ბიზნესს მალავს.

• ნათია კუკულაძის განცხადებით, "ეს ტექნიკური გაუგებრობა იყო, რომელიც ოპერატიულად აღმოიფხვრა".

"წლებია ყოველთვის დეტალურად და სრული პასუხისმგებლობით ვავსებ დეკლარაციას, ასე მოხდა 2022 წელსაც, შესაბამისად, ჩემთვის სრულიად მოულოდნელი იყო დღეს გავრცელებული ინფორმაცია. დაუყონებლივ მივმართე საჯარო სამსახურის ეროვნულ ბიუროს საკითხის შესწავლის მიზნით, როგორც გაირკვა, ტექნიკური გაუგებრობა იყო, რომელიც ოპერატიულად აღმოიფხვრა," - აცხადებს კუკულაძე.

ცნობისთვის, "საერთაშორისო გამჭვირვალობა - საქართველომ" გამოაქვეყნა კვლევა, რომელშიც აღნიშნული იყო, რომ კუკულაძემ 2022 და 2023 წლებში შევსებულ დეკლარაციებში არ მიუთითა თანამდებობიდან მიღებული შემოსავალი, უძრავი ქონება და ინფორმაცია მისი მეუღლის, ოთარ ლორთქიფანიძის, სამეწარმეო საქმიანობის შესახებ.

ასევე იხილეთ:

• ვინ არის კომუნიკაციების კომისიის წევრი, რომელიც დეკლარაციაში ხელფასს, 5 უძრავ ქონებასა და მეუღლის ბიზნესს მალავს - "საერთაშორისო გამჭვირვალობის" კვლევა