"საქართველოს ხელისუფლება ვალდებულია, დაიცვას საქართველოს ყველა მოქალაქის ძირითადი უფლებები"- აშშ-ის საელჩო "პრაიდ ფესტივალის" ირგვლივ განვითარებულ მოვლენებს ეხმაურება
აშს-ის საელჩო თბილისის "პრაიდ ფესტივალის" ირგვლივ განვითარებულ მოვლენებთან დაკავშირებით განცხადებას ავრცელებს.
როგორც განცხადებაშია აღნიშნული, "პრაიდ ფესტივალის" წევრების წინააღმდეგ მიმართული ძალადობა, დაშინება ან მუქარა არადემოკრატიულია და საქართველოს ტოლერანტობის, თანაგრძნობისა და პლურალიზმის ისტორიას ეწინააღმდეგება.
"დღეს თბილისი პრაიდი იძულებული გახდა, გაეუქმებინა დაგეგმილი დახურული ღონისძიება, რადგან უმართავმა ხალხის მასამ, რომელიც ძალადობით იმუქრებოდა, დამსწრეებს მშვიდობიანი შეკრების შესახებ კონსტიტუციით დაცული უფლება წაართვა. საქართველოს ხელისუფლება ვალდებულია, დაიცვას საქართველოს ყველა მოქალაქის ძირითადი უფლებები. ძალადობა, დაშინება ან მუქარა განსხვავებული შეხედულებების გასაჩუმებლად არის არადემოკრატიული და ეწინააღმდეგება საქართველოს ტოლერანტობის, თანაგრძნობისა და პლურალიზმის ისტორიას. მოვუწოდებთ ხელისუფლებას, პასუხისგებაში მისცეს ყველა, ვინც კანონი დაარღვია და ნათლად აჩვენოს, რომ ძალადობა მიუღებელია",- ნათქვამია აღნიშნულ განცხადებაში.