ვინ არის პრკურატურის მიერ ბრალდებული, რუსეთ-საქართველოს ორმაგი მოქალაქე გიორგი ბაჩიაშვილი, რომელიც წლების განმავლობაში ივანიშვილის ნდობით სარგებლობდა?
6 ივლისს ცნობილი გახდა, რომ პროკურატურამ თანაინვესტირების ფონდის ყოფილ ხელმძღვანელს გიორგი ბაჩიაშვილს ბრალი წარუდგინა. გამოძიების ინფორმაციით, ბაჩიაშვილმა 39 მილიონ აშშ დოლარზე მეტი ღირებულების ბიტკოინი მიითვისა.
განცხადებიდან ირკვევა, რომ დანაშაული ჩადენილია წლების წინ, კერძოდ ოფიციალურ ინფორმაციაში ნათქვამია, რომ ბრალდებულმა 2017 წელს ინვესტორის კუთვნილი 8 253.13 ოდენობის ბიტკოინი მართლსაწინააღმდეგოდ მიითვისა, რომლის ღირებულებაც მისი მართლსაწინააღმდეგოდ დაუფლების პერიოდში 39 215 820 აშშ დოლარს შეადგენდა. (წაიკითხეთ: პროკურატურამ თანაინვესტირების ფონდის ყოფილ ხელმძღვანელს გიორგი ბაჩიაშვილს ბრალი წარუდგინა - "მიითვისა ბიტკოინები, რომლის ღირებულება 39 215 820 აშშ დოლარს შეადგენდა").
ბაჩიაშვილი ამ დროისთვის დაკავებული არ არის. პროკურატურა ბრალდებულის მიმართ შესაბამის აღკვეთის ღონისძიების შეფარდების მოთხოვნით, სასამართლოს კანონით დადგენილ ვადაში მიმართავს.
- ვინ არის გიორგი ბაჩიაშვილი?
ის ფართო საზოგადოებამ 2013 წელს გაიცნო, როდესაც ხელისუფლებაში ახლად მოსულმა ბიძინა ივანიშვილმა ბაჩიაშვილს მისი თანამონაწილეობით დაფუძნებული თანაინვესტირების ფონდის დირექტორობა ანდო. 2013 წლიდან, 6 წლის განმავლობაში იკავებდა აღმასრულებელი დირექტორის პოზიციას, 2019 წლის მაისიდან კი, მან გადაინაცვლა მრჩეველთა საბჭოს თავმჯდომარის პოზიციაზე, სადაც იგი ზედამხედველობას უწევს ფონდის მანდატის შესაბამისად მუშაობას. საუბარი იყო მისი ეკონომიკის მინისტრად დანიშვნაზე. თუმცა საბოლოოდ ბაჩიაშვილი ფონდის მრჩეველთა საბჭოში დარჩა.
თავიდანვე ცნობილი იყო, რომ 28 წლის ახალგაზრდა ექსპრემიერის ნდობით სარგებლობდა და მასთან დაახლოებული პირი იყო. მისი სახელი რამდენჯერმე ახსენეს სწორედ ამ კონტექსტში.
კერძოდ, გასული წლის აპრილში "საერთაშორისო გამჭირვალობა" საქართველომ გამოაქვეყნა კვლევა, სახელმწოდებით "ბიძინა ივანიშვილის და მისი ნათესავების რუსული ბიზნესი". იმ ადამიანებს შორის, ვისაც ივანიშვილი საკუთარ ბიზნესსა და აქტივებს ანდობს, დასახელებული იყო გიორგი ბაჩიაშვილი.
ის ასევე იკავებდა ექსპრემიერის მრჩევლის პოზიციას ჯერ კიდევ თვეების წინ და სწორდ ამ რანგში მისცა ჩვენება სინგაპურში გამართულ პროცესზე, სადაც ივანიშვილისა და Credit Suisse Trust-ის დავა განიხილებოდა. მაშინ ბაჩიაშვილმა სასამართლო პროცესზე ისაუბრა იმ შეუსაბამობებზე, რის გამოც ივანიშვილი უპირისპირდება Credit Suisse Trust-ს (სინგაპური), რომელსაც ასობით მილიონის ინვესტიცია მიანდო.
"ნაწილი ადამიანური შეცდომა იყო, მაგრამ ზოგიერთ შემთხვევაში, თარიღები შეცვლილია, რაც აშკარად არ იყო ადამიანური შეცდომა", - თქვა ბაჩიაშვილმა.
ბაჩიაშვილის თქმით, მან შექმნა მონაცემთა ბაზა მილიარდერის ფულის თვალყურის მისადევნებლად, მაგრამ ის ეყრდნობოდა ლესკოდრონისგან მიღებულ მონაცემებს და იმ დროს არ ჰქონდა მიზეზი, რომ მონაცემების სანდოობა ეჭვქვეშ დაეყენებინა.
უფრო მეტიც, ბაჩიაშვილმა თქვა, რომ არც ის და არც ივანიშვილი რაიმე ფორმით არ უბიძგებდნენ ლესკოდრონს, გარკვეული ინვესტიციები განეხორციელებინა. მათ ეს ბანკის მრჩევლებს მიანდვეს.
- აღსანიშნავია, რომ გიორგი ბაჩიაშვილი 2014 წელს Forbes-მა 30 წლამდე ყველაზე წარმატებულ ადამიანებს შორის დაასახელა. კერძოდ, ფინანსების მიმართულებით 30 under 30-ში ბაჩიაშვილი 28 წლის ასაკში მოხვდა. მაშინ გამოცემა წერდა, რომ ბაჩიაშვილი $6 მილიარდიან კერძო ფონდს ხელმძღვანელობდა, რომელიც იმ დროინდელი საქართველოს მშპ-ს 40%-ს უდრიდა.
"ბიზნესპრესნიუსი" წერს, რომ ბაჩიაშვილი რუსეთ-საქართველოს ორმაგი მოქალაქეა. 35 წლის გიორგი ბაჩიაშვილი პროფესიით ფინანსისტია, ის წლების განმავლობაში მოსკოვში ცხოვრობდა. მისი მშობლები ექიმები არიან. ასევე ჰყავს და, ნინო ბაჩიაშვილი, რომელიც წარსულში სამოდელო სააგენტო "ნატალის" მოდელი იყო და წარმატებული სამოდელო კარიერა ჰქონდა. ის ქართველ ბიზნესმენზეა გათხოვილი.
გიორგი ბაჩიაშვილი გოგონებში ყოველთვის დიდი პოპულარობით სარგებლობდა, თუმცა ოჯახი ამ დრომდე არ შეუქმნია. ის მოსკოვის ექს-ვიცე მერის სოსო ორჯონიკიძის ვაჟის, ნიკუშა ორჯონიკიძის ძმაკაცია.
ბაჩიაშვილი გატაცებულია ავტოსპორტით და უყვარს მოგზაურობა. ის არც ექსტრემალურ თავგადასავლებზე ამბობს უარს, რასაც მისი პირადი "ინსტაგრამის" გვერდიც მოწმობს, რომელიც წლების განმავლობაში საჯარო ჰქონდა, ცოტა ხნის წინ კი დახურა.
წაიკითხეთ ასევე: