"უნდა ვივარაუდოთ, რომ ორ ქვეყანას შორის დიპლომატიური ურთიერთობა კიდევ უფრო დაიძაბება" - ზელენსკის გადაწყვეტილება და კრიზისი საქართველო-უკრაინის ურთიერთობაში
- ფოტო: არქივიდან
უკრაინის პრეზიდენტმა ვოლოდიმირ ზელენსკიმ 2 ივლისს გამართულ ბრიფინგზე განაცხადა, რომ მიხეილ სააკაშვილის უკრაინაში დაბრუნებას ითხოვს. მისივე თქმით, ის ყველაფერს გააკეთებს იმისთვის, რომ უკრაინის მოქალაქე და საქართველოს ყოფილი პრეზიდენტი, რომელიც ამჟამად საქართველოშია დაკავებული, უკრაინაში დააბრუნოს.
ზელენკის განცხადებით, უკრაინა საქართველოს ელჩს, თბილისთან კონსულტაციის მიზნით, 48 საათის განმავლობაში კიევის დატოვებას სთავაზობს.
"სწორედ ახლა რუსეთი კლავს უკრაინის მოქალაქე მიხეილ სააკაშვილს საქართველოს ხელისუფლების ხელით.
ჩვენ არაერთხელ მოვუწოდეთ ოფიციალურ თბილისს, შეწყვიტოს ეს დაცინვა და შეთანხმდეს სააკაშვილის უკრაინაში დაბრუნებაზე. ჩვენმა პარტნიორებმა ასევე შემოგვთავაზეს სხვადასხვა სამაშველო ვარიანტები.
დღეს საგარეო საქმეთა სამინისტროს დავავალე, რომ დაურეკოს საქართველოს ელჩს უკრაინაში, გამოხატოს მის წინაშე ძლიერი პროტესტი და შესთავაზოს უკრაინის დატოვება 48 საათის განმავლობაში საქართველოს დედაქალაქთან კონსულტაციებისთვის.
კიდევ ერთხელ მოვუწოდებ საქართველოს ხელისუფლებას, უკრაინის მოქალაქე მიხეილ სააკაშვილი უკრაინას გადასცეს საჭირო მკურნალობისა და ზრუნვისთვის და მე მოვუწოდებ ჩვენს პარტნიორებს, არ უგულებელყოთ ეს ვითარება და გადაარჩინოთ ეს ადამიანი.
ევროპაში არცერთ ძალას არ აქვს უფლება სიკვდილით დასაჯოს ადამიანები, სიცოცხლე არის ძირითადი ევროპული ღირებულება“, - ნათქვამია ვოლოდიმირ ზელენსკის განცხადებაში.
მისი თქმით, სააკაშვილის დაბრუნების საკითხს "ყველა ინსტიტუტი“, მათ შორის საგარეო საქმეთა სამინისტრო და საქართველოსა და უკრაინაში მოქმედი საელჩოები განიხილავენ.
საქართველოს ხელისუფლებაში ამ განცხადებას შეურაცხმყოფელი უწოდეს. "უკრაინის ხელისუფლების პოზიცია ჩვენთვის არის შეურაცხმყოფელი, თუმცა ჩვენი სურვილია, თუნდაც ცალმხრივი მეგობრობის რეჟიმში დავრჩეთ უკრაინასთან, რადგან ეს ქვეყანა არის დღეს ომის მდგომარეობაში", - განაცხადა "ქართული ოცნების" თავმჯდომარე ირაკლი კობახიძემ.
ორ ქვეყანას შორის შექმნილ ვითარებაზე Ambebi.ge-სთან საერთაშორისო ურთიერთობების სპეციალისტი, ჯიპა-ს პროფესორი გიორგი კობერიძე საუბრობს:
"ქართულ-უკრაინული ურთიერთობების გაფუჭება ომამდე დაიწყო და მოყოლებული 2021 წლიდან მოვლენები ნელ-ნელა ვითარდებოდა. ეს ყველაფერი არა მხოლოდ მიხეილ სააკაშვილს, არამედ ომამდე და ომის პერიოდში არსებულ რიტორიკასაც უკავშირდება. უკრაინის პრეზიდენტის განცხადება საქართველოსთვის უარყოფითი "სიგნალია“, ვინაიდან ზელენსკის მოკავშირეებმა საქართველოს ხელისუფლების კომენტარები ამ საკითხზე საკმაოდ ნეგატიურად აღიქვეს.
თუმცა ეს ყველაფერი უკრაინასა და საქართველოს შორის დიპლომატიური ურთიერთობების გაწყვეტას არ ნიშნავს. ელჩი, საქართველოში დაბრუნების შემდეგ, საკმაოდ აქტიურად გაივლის დეტალურ კონსულტაციას ხელისუფლებასთან, მაგრამ თუ მის ვიზიტს ამ ყველაფრის გამოსწორების მცდელობა ან რიტორიკის შეცვლა არ მოჰყვება, უნდა ვივარაუდოთ, რომ შორეულ პერსპექტივაში, ორ ქვეყანას შორის დიპლომატიური ურთიერთობა კიდევ უფრო დაიძაბება“.
"თუ თავს გავანებებთ იმას, ვის მოსწონს, ან არ მოსწონს ზელენსკის გადაწყვეტილება და პრაქტიკული პოლიტიკური შედეგების ენაზე ვისაუბრებთ, მარტივად დავინახავთ, რომ უკრაინის ომში გამარჯვების შემდეგ ახალი მსოფლიო წესრიგის დამკვიდრების ერთ-ერთი მცირე ელემენტი იქნება ციხეში სააკაშვილის პირობითი ღარიბაშვილით ჩანაცვლება…" - მიიჩნევს პოლიტიკურ საკითხთა ექსპერტი გია ხუხაშვილი.
მისი აზრით, ზელენსკის გადაწყვეტილების მიზეზები სააკაშვილის თემაზე უფრო სერიოზული და სისტემური ხასიათისაა.
"ზელენსკიმ გადაწყვეტილება მიიღო მიშას გამო” - ნარატივი და პოლიტიკური დისკუსიის ამ კუთხით წარმართვა რეალური მიზეზების დავიწროვება და მხოლოდ უმძიმესი გრძელვადიანი სახელმწიფოებრივი პრობლემის ხელისუფლების და "ნაცმოძრაობის" პაექრობის პრიზმაში გადაყვანის მცდელობაა, რაც ისევ და ისევ ამ ორი პარტიის ინტერესებშია.
სინამდვილეში გადაწყვეტილების მიზეზები ბევრად უფრო სერიოზულ და სისტემურ ხასიათს ატარებს.
უკრაინა არის გლობალური ომის წინა ხაზზე და ბუნებრივია საკუთარი პარტნიორებისგან ითხოვს მაქსიმალურ სოლიდარობას, თანადგომას და მკვეთრი ფრონტის ხაზის გამოკვეთას.
თუ თქვენ ვიღაცას მეგობრობას ეფიცებით, მას აქვს სამკვდრო-სასიცოცხლო კონფლიქტი ვიღაცასთან და თქვენ იმ “ვიღაცასთან” აქტიურად თანამშრომლობთ, ბუნებრივია, მეგობარს უჩნდება სერიოზული კითხვები თქვენს მიმართ.
რეალური მიზეზი ეს არის და არა მიშა, რაც დიდი, სისტემური პრობლემის მხოლოდ ერთი კომპონენტია", - წერს ექსპერტი სოციალურ ქსელში.
შეგახსენებთ, რომ მიხეილ სააკაშვილმა საქართველოში დაბრუნების შესახებ 2021 წლის 28 სექტემბერს განაცხადა. მოგვიანებით, მან "ფეისბუქის" საკუთარ გვერდზე დაწერა, რომ საქართველოში 1-ლ ოქტომბერს, დილით ჩამოვიდა.
იმავე დღეს, საღამოს, პრემიერ-მინისტრმა ირაკლი ღარიბაშვილმა სააკაშვილის დაკავების შესახებ განაცხადა. ყოფილი პრეზიდენტი თბილისის გარეთ, ქალაქ რუსთავის მე-5 საპყრობილეში გადაიყვანეს, ამ ეტაპზე კი კლინიკა "ვივამედში" გადის მკურნალობის კურსს.
იხილეთ ასევე: