სოციალურ ქსელში ვანო მერაბიშვილზე თავდასხმის ამსახველი კადრები ვრცელდება (ვიდეო) - რას აცხადებენ "ქართულ ოცნებაში" ამის თაობაზე?
სოციალურ ქსელში ვანო მერაბიშვილზე თავდასხმის ამსახველი კადრები ვრცელდება. შეგახსენებთ, შინაგან საქმეთა ყოფილ მინისტრს ვანო მერაბიშვილს ვაკეში ფიზიკურად გია გაჩეჩილაძის (უცნობი) სიძე, გიორგი (გიგიშა) შარაშიძე გაუსწორდა. შემთხვევა ა.წ. 2 იანვარს, ვაკეში მდებარე ერთ-ერთ აფთიაქში მოხდა.
"დაპირისპირება მოხდა ჩემს და ვანო მერაბიშვილს შორის აფთიაქში. დაპირისპირებასაც ვერ დავარქმევ, რადგან პირველივე წამებიდან გაიქცა ვანო მერაბიშვილი. იქიდან გამომდინარე რომ საზოგადოების დიდი ინტერესია, მე ჩავთვალე თავი ვალდებულად. არც გამოძიებას ვემალები და არც პასუხისმგებლობას გავურბივარ. თუ საჭირო გახდა, დანარჩენზე პასუხს გავცემ სამართალდამცველ ორგანოებს. დანარჩენი, თუ ცოტა მაინც ვაჟკაცობა შერჩენია, თვითონ თქვას," - აცხადებდა იმჟამად გიგიშა შარაშიძე.
აღსანიშნავია, რომ გიგიშა შარაშიძე საზოგადოების ყურადღების ცენტრში 2017 წელსაც მოექცა, როდესაც გია გაჩეჩილაძე მაშინდელ პრემიერ-მინისტრს გიორგი კვირიკაშვილს დაუპირისპირდა. დაპირისპირების მიზეზი კი სწორედ მისი სიძე გახლდათ.
გიგიშა შარაშიძე, "სიტროენ ჯორჯიას" დირექტორი იყო. სიძე-სიმამრი აცხადებდნენ, რომ სახელმწიფო შესყიდვები არასწორად ტარდებოდა და ამის დამამტკიცებელი დოკუმენტაციაც ჰქონდათ.
მაშინ შარაშიძემ ე.წ. კარტელურ გარიგებებზე დოკუმენტაცია კანცელარიაში მიიტანა, საღამოს კი, უცნობი ტელევიზიით გამოვიდა და საზოგადოებას, პრემიერისთვის გაგზავნილი მესიჯები სახალხოდ წაუკითხა.
გიგიშა წლებია უცნობის ერთადერთი ქალიშვილის, ირინა გაჩეჩილაძის მეუღლეა.
ვერ ვხედავ მიზეზს, რატომ შეგიძლიათ თქვათ, რომ კადრების უფრო დიდი და სრული ვერსიის გავრცელება შედიოდა "ქართული ოცნების" ინტერესებში - არ შეიძლება ეს გაგებული იყოს, როგორც დაშინების მცდელობა, - ამის შესახებ ადამიანის უფლებათა კომიტეტის თავმჯდომარე მიხეილ სარჯველაძემ განაცხადა, რითაც უპასუხა კითხვას, კადრების გავრცელებით, სადაც ჩანს, რომ ვანო მერაბიშვილს სცემენ, ცდილობს თუ არა „ქართული ოცნება“ ოპონენტები დააშინოს.
მისი თქმით, მსგავსი ბრალდებების წამოყენება უაპელაციოდ ხდება.
ოპოზიციაში აცხადებენ, რომ ამ კადრების გავრცელებით ხელისუფლება ოპონენტების დაშინებას ცდილობს.
ამის თაობაზე ჟურნალისტებმა ადამიანის უფლებათა კომიტეტის თავმჯდომარეს მიხეილ სარჯველაძეს ჰკითხეს.
"უაპელაციოდ ამბობთ ხოლმე, თითქოს "ქართული ოცნებისთვის" სასარგებლო და ხელსაყრელი იყო, მე კიდე ვერ ვხედავ მიზეზს, რატომ შეგიძლიათ თქვათ, რომ მაგალითად ამ კადრების ან უფრო დიდი და სრული ვერსიის გავრცელება შედიოდა "ქართული ოცნების" ინტერესებში. მე ამას ვერ ვხედავ. იმის თქმა, რომ ეს შეიძლება იყოს ინტერპრეტირებული როგორც დაშინების მცდელობა, რასაკვირველია, კატეგორიულად მიუღებელია, არამც და არამც არ შეიძლება ეს გაგებული იყოს როგორც დაშინების მცდელობა”, - განაცხადა სარჯველაძემ.
მისივე თქმით, ნებისმიერი ძალადობა მიუღებელია.
მას ასევე ჰკითხეს, თუ რატომ არ ითანამშრომლა ვანო მერაბიშვილმა ამ ფაქტთან დაკავშირებით გამოძიებასთან, რაზეც სარჯველაძე პასუხობს, რომ ეს შეიძლება აიხსნას ბევრი მიზეზით, მათ შორის, მერაბიშვილის მენტალიტეტით ან იმით, რომ "რაიმე აქვს დასამალი“.
"მე არ ვიცი, რა მენტალიტეტით ხელმძღვანელობს რომელიმე კონკრეტული ადამიანი, რომელიც ასეთ დროს ასე გეგმავს ურთიერთობას სახელმწიფო დაწესებულებებთან, მაგრამ არ ვიცი, აქ შეიძლება მიზეზთა ერთობლიობა იყოს, შეიძლება მენტალიტეტი აქვს ასეთი, შეიძლება დასამალი აქვს რაიმე”, - განაცხადა სარჯველაძემ.