ჩეჩნეთში თავს დაესხნენ ადვოკატს და "ნოვაია გაზეტას" ჟურნალისტს - გზა გადაუჭრეს, სცემდნენ ხელკეტებითა და წიხლებით, ჟურნალისტს გადამტვრეული აქვს თითები
4 ივლისს, დაახლოებით გამთენიის ხუთ საათზე, ჩეჩნეთში, აეროპორტიდან გროზნოსკენ მიმავალ გზაზე უცნობი პირები თავს დაესხნენ "ნოვაია გაზეტას" ჟურნალისტს, ელენა მილაშინას და ადვოკატ ალექსანდრე ნემოვს. ორივე მათგანი სასტიკად არის ნაწამები.
ნემოვი ყოფილი ოპოზიციურად განწყობილი ჩეჩენი აქტივისტების, აბუბაქარ და იბრაგიმ იანგულბაევების დედის, ზარემა მუსაევას ადვოკატია.
"ნოვაია გაზეტას" ჟურნალისტი, ადვოკატთან ერთად, გრზონოში სწორედ ზარემა მუსაევას სასამართლო პროცესზე დასასწრებად მიდიოდა. ქალს ბრალად ედება პოლიციელის შეურაცხყოფა.
ეს არ არის ჩეჩნეთში ადვოკატებზე და ჟურნალისტებზე თავდასხმის პირველი შემთხვევა, მაგრამ არცერთი წინა ინციდენტი არ გამოუძიებიათ და არავინ დასჯილა.
- როგორც kavkazr.com წერს, აეროპორტიდან გროზნოსკონ მიმავალ ადვოკატის მანქანას, რომელშიც ჟურნალისტიც იმყოფებოდა, გზა გადაუჭრა სამმა მანქანამ, რომელშიც იარაღითა და ხელკეტებით შეიარაღებული პირები ისხდნენ.
ისინი ჟურნალისტსა და ადვოკატს ხელკეტებითა და წიხლებით ფიზიკურად უსწორდებდნენ და მოკვლით ემუქრებოდნენ. თავდამსხმელებმა მათ გაუნადგურეს ყველა ის ტექნიკა, რომელიც თან ჰქონდათ.
სასტიკად აწამეს ჟურნალისტი, მას თმა გადაპარსეს, თითები დაამტვრიეს და გარდა ამისა, თავზე მწვანე სითხე გადაასხეს. ნაწამები არის ადვოკატიც.