"უფრო დიდი საცოდაობა ადამიანის შესრულებით, რომელიც პრეზიდენტს ჰგავს, დიდი ხანია არ მინახავს" - გამოხმაურება "ისტორიული მიმართვის" შემდგომ და დიქტატორის სხეულის ენა

რუსეთის პრეზიდენტის, ვლადიმერ პუტინის 26 ივნისის მიმართვამ, შეიძლება ითქვას, რომ სოციალური ქსელები "ააფეთქა". პუტინის გამოსვლამდე სამთავრობო მედია, მათ შორის კრემლის პრესსამსახური და რაღა თქმა უნდა, პროპაგანდისტები აანონსებდნენ, რომ "დიდი სტრატეგის“ გამოსვლა რუსეთის მომავალს შეცვლიდა.

თუმცა პუტინის გამოსვლა 5 წუთზე ცოტა მეტხანს გაგრძელდა, ჯერ "ვაგნერის“ ამბოხის ამბავს მიედ-მოედო, მერე ულვაშიან დიქტატორ ლუკაშენკოს მადლობა გადაუხადა და მიმართვაც დაასრულა...

მაყურებელი სახტად დარჩა, გაოცებულები კითხულობდნენ, - ამ მიმართვას როგორ უნდა შეეცვალა რუსეთის მომავალი?.. არადა, დაწყებამდე "ტელეგრამარხები“ ისტორიკოსებს მოუწოდებდნენ, რომ 26 ივნისის გადაწყვეტილებები რუსეთის ისტორიაში ახალ თავად გაეხსნათ და პრეზიდენტისთვის ყურადღებით მოესმინათ.

კრემლის პრესმდივან დმიტრი პესკოვის ციტატას: "პრეზიდენტის მიმართვა რუსეთის ბედს განსაზღვრავს“ ყველა აზიარებდა, თუმცა მოგვიანებით ბევრმა წაშალა.

უშუალოდ მიმართვაც ბევრ კითხვის ნიშანს აჩენდა, მაგალითად, ვლადიმირ პუტინის შესავალი სიტყვა:

"დღეს კიდევ ერთხელ მოგმართავთ“, - თქვა დიქტატორმა, არადა, 26 ივნისს ეს მისი პირველი გამოსვლა იყო.

უკრაინულმა "ტელეგრამარხებმა" პუტინის სახის გამომეტყველებაზე გაამახვილეს ყურადღება. მათი თქმით, მისი დგომისა და საუბრის მანერა, კამერაზე ჩაშტერება უფრო დადგმულს და კარგად ნამეცადინებს ჰგავდა. პუტინი ვიდეოში სრულად არ გამოჩენილა, თუმცა აშკარა იყო, როგორ ინაცვლებდა ფეხიდან ფეხზე და ირწეოდა, რაც დროდადრო უფრო შესამჩნევი იყო.

"ამგვარი რწევა ჩვეულებრივ, ღელვის ან თვითრწმენის არქონის ნიშანია", - ამბობს სხეულის ენის ექსპერტი მაიკ კარტერი.

პუტინს ამ მიმართვისას არ გამოუყენებია ჟესტიკულაცია, არადა, სხვა გამოსვლებიდან გვახსოვს, რომ ის საკმაოდ თავისუფლად ხმარობს ხოლმე საუბრისას ხელებს.

ექსპერტთა თქმით, ამჯერად ჟესტიკულაციის არქონა მის შებოჭილ და შეზღუდულ მდგომარეობაზე მეტყველებს.

რუსი სამხედრო პირი და ომის მიმომხილველი იგორ სტრელკოვ-გირკინი მყისიერად გამოეხმაურა პრეზიდენტის გამოსვლას:

"უფრო დიდი საცოდაობა ადამიანის შესრულებით, რომელიც პრეზიდენტს ჰგავს, დიდი ხანია არ მინახავს. ყველა - მაგრები ხართ. ყველამ მაგრად იმუშავეთ, დროა შოიგუს ორდენიც დავაწესოთ, თვითონ შოიგუ მარშალად დავნიშნოთ“, - ირონიულად დაწერა სტრელკოვმა.

ავტორიტეტული რუსული "ტელეგრამარხებიც" მსუბუქ შოკში იყვნენ:

"გაუკრვეველი ვიდეო, გაურკვეველი დასასრულით. ეს რა იყო საერთოდ?“ - წერს ერთ-ერთი მათგანი.

"მოკლედ რომ შევაფასო პრეზიდენტის გამოსვლა, გამოდის, რომ ჯერ "ქვეყნის პირველი პირი“ კითხულობს მრისხანე სიტყვას, რომ ყველა ცუდია, უნდოდათ გადატრიალების მოწყობა, თუმცა შემდეგ ამავე ხალხს აქებს და ნებას რთავს ბელარუსში გადავიდნენ. ამით ამთავრებს გამოსვლას... სისტემა ამოლპა“, - აგრძელებს მეორე.

სხვათა შორის, ხუმრობით ვიკიპედიაში სტატიაც გაჩნდა - "პუტინის 26 ივნისის ისტორიული მიმართვა".

"მიზეზი, რის გამოც ეს გამოსვლა ისტორიაში შევიდა, თანამედროვე მეცნიერებისთვისაც უცნობია. გამოსვლის აზრი და შინაარსი - დღემდე გამოცანა რჩება. ამ მიმართვის შედეგად, ქვეყნის ბედი არანაირად არ შეცვლილა“, - ვკითხულობთ სტატიაში.

მოგვიანებით მოდერატორებმა ვიკიპედიის ეს სტატია წაშალეს.

თუმცა ყველაზე საინტერესო პუტინის გამოსვლის შემდეგ დაიწყო:

გვიან ღამით მან ძალოვნების საბჭო მოიწვია. გამოჩნდა პრიგოჟინის "სამართლიანობის მარშის“ მთავარი სამიზნე, რუსეთის თავდაცვის მინისტრი სერგეი შოიგუც. თუ კი პრიგოჟინი ამ შეხვედრის კადრებს უყურებდა, ცოტათი მაინც იამაყებდა იმით, მისმა ამბოხმა შოიგუს სახეზე როგორ იმოქმედა.

არა მხოლოდ შოიგუს, დააკვირდით, დანარჩენებიც როგორ გამოიყურებოდნენ.

აშკარაა, რომ პუტინისგან "აღმზრდელობით“ საუბარს ისმენდნენ...

• ავტორი: ანრი კურტანიძე