ერთი ვერსიით, უნგრეთმა უკრაინის ევროკავშირში გაწევრებას შესაძლოა იმ შემთხვევაში დაუჭიროს მხარი, თუ საქართველოს კანდიდატის სტატუსი მიენიჭება - ექსპერტის შეფასება
"რადიო თავისუფლების" ევროპის ბიუროს რედაქტორის, რიკარდ იოზვიაკის თქმით, უნგრეთმა შესაძლოა ვეტო დაადოს უკრაინის ევროკავშირში გაწევრების შესახებ მოლაპარაკებების დაწყებას და მოითხოვოს საქართველოსთვის კანდიდატის სტატუსი.
მისივე ცნობით, ბრიუსელში მოხსენების წარდგენის შემდეგ გამართულ დისკუსიაში უნგრეთი ძალიან აკრიტიკებდა კიევს.
"ვარაუდობენ, რომ უნგრეთი უკრაინის ევროკავშირში გაწევრიანების მოლაპარაკებების დაწყებას ხელს იმ შემთხვევაში მოაწერს, თუ ევროკავშირის სხვა ქვეყნები საქართველოსთვის კანდიდატის სტატუსის მინიჭებას დათანხმდებიან. საქართველოს კანდიდატის სტატუსი შარშან უარყვეს მას შემდეგ, რაც ქვეყანაში რეფორმების ნაწილი გაუქმდა", - წერს გამოცემა pravda.com.ua.
"ბოლო წლებში საქართველოს მთავრობამ უფრო მჭიდრო ურთიერთობა დაამყარა ბუდაპეშტთან“, - განმარტავს იოზვიაკი. მისივე თქმით, საქართველოს სტატუსზე კონსენსუსის მიღწევა "რბილად რომ ვთქვათ, რთული იქნება“.
ამ საკითხებზე Ambebi.ge-სთან საერთაშორისო ურთიერთობების სპეციალისტი, ჯიპა-ს პროფესორი გიორგი კობერიძე საუბრობს:
"დავიწყებ იმით, რომ უკრაინის ევროკავშირში გაწევრებაზე ლაპარაკი ჯერ ნაადრევია - ჯერჯერობით ეს მხოლოდ პოლიტიკური საუბარია და სხვა არაფერი, რადგან უკრაინის გაწევრებისთვის არაერთი საფეხურია გასავლელი - სულ ცოტა, მოლაპარაკებების დაწყებაა საჭირო. ეს კი საკმაოდ ხანგრძლივი პროცესია და ასე ნაჩქარევად არ ხდება.
რაც შეეხება საქართველოს, პრეცედენტი, რომ ჩვენს ქვეყანას ვიღაც მხარს უჭერს, თუნდაც ეს იყოს უნგრეთი, ყოველთვის მისასალმებელი იქნება. მართალია, უნგრეთი ცდილობს საქართველოს გამოყენებას. ამით ის საკუთარ თავს ობიექტურ მსაჯულად წარმოაჩენს, - თუ უკრაინას შეუძლია ჰქონდეს კანდიდატის სტატუსი, რატომ არ შეუძლია საქართველოსო. ყველაფრის მიუხადავად, ეს ჩვენთვის ნამდვილად პოზიტიური მოვლენაა.
საქართველოს საწინააღმდეგო ევროკავშირს არაფერი აქვს, შესაბამისად, მისთვის კანდიდატის სტატუსის მინიჭებას აუცილებლად განიხილავს.
ერთადერთი ცუდი, რაც ამ ყველაფერმა შეიძლება გამოიწვიოს არის ის, რომ ევროკავშირის ზოგიერთმა ქვეყანამ ეს მხარდაჭერა უნგრეთის მხრიდან ერთგვარ "შურისძიებად“ არ აღიქვას.
საქმე ისაა, რომ უნგრეთი ანტიუკრაინული სახელმწიფო უფროა, ვიდრე პრორუსული. იმის გათვალისწინებით, რომ მასთან აქვს, როგორც ტერიტორიული დავა, ასევე ეთნიკურ მოსახლეობასთან დაკავშირებული პრობლემები“.
იხილეთ ასევე: