საბერძნეთის საპარლამენტო არჩევნებში მმართველი პარტია ლიდერობს

საბერძნეთში ჩატარებულ საპარლამენტო არჩევნებში მმართველი პარტია „ახალი დემოკრატია“ ლიდერობს.

მედიის ინფორმაციით, ხმების 95%-ის დათვლის შედეგად აღმოჩნდა, რომ პრემიერ-მინისტრ კირიაკოს მიცოტაკისის პარტიამ ხმების 40.5% მიიღო, რაც იმას ნიშნავს, რომ პარტიას 300-ადგილიან პარლამენტში დაახლოებით 157 მანდატი ექნება.

რაც შეეხება ოპოზიციურ მემარცხენე პარტია „სირიზას“, ის ხმების 18%-ით მეორე ადგილზე გავიდა.

არჩევნებში მონაწილეობისთვის 9.8 მილიონი ამომრჩეველი იყო რეგისტრირებული, პარლამენტში ადგილების მოსაპოვებლად 32 პარტია იბრძოდა.

პრემიერ-მინისტრ მიცოტაკისის პარტიამ მაისში გამართულ არჩევნებში გამარჯვება მოიპოვა, მაგრამ ერთპარტიული მთავრობის ჩამოსაყალიბებლად 300-ადგილიან პარლამენტში ხუთი მანდატი დააკლდა. ამის შემდეგ მიცოტიაკისმა არჩევნების მეორე ტურის დანიშვნის გადაწყვეტილება მიიღო. საბერძნეთში მოქმედი საარჩევნო რეგულაციების მიხედვით, მეორე ტურში გამარჯვებული პარლამენტში დამატებით 50 ადგილს მიიღებს.