არქეოლოგებმა ჯუნგლებში უძველეს ქალაქს მიაკვლიეს - მაიას ცივილიზაციის შესახებ კიდევ ერთი აღმოჩენა

მექსიკაში, იუკატანის ნახევარკუნძულის ჯუნგლებში, მეხიკოდან 1100 კილომეტრში, არქეოლოგებმა უძველესი ქალაქის ნაშთები აღმოაჩინეს. ექსპერტებმა პირამიდის მსგავსი რამდენიმე სტრუქტურა იპოვეს, რომელთა სიმაღლე 15 მეტრია.

ადგილზე აღმოაჩინეს ნივთები, რომლებსაც სავარაუდოდ ჭურჭლის დანიშნულება ჰქონდა. ეს კი მიუთითებს, რომ ტერიტორია ჩვენს წელთაღრიცხვამდე 600-დან 800 წლამდე პერიოდში დასახლებული უნდა ყოფილიყო.

ისტორიკოსებმა ქალაქს Ocomtún უწოდეს, რაც მაიას ენაზე ქვის სვეტს ნიშნავს.

მექსიკის ანთროპოლოგიისა და ისტორიის ეროვნულ ინსტიტუტში (INAH) აცხადებენ, რომ ქალაქის აღმოჩენა საველე სამუშაოების შედეგი იყო, რომელიც მიზნად ისახავდა უძველესი არქეოლოგიური აღმოჩენების ტერიტორიის დოკუმენტირებას.

გუნდის ხელმძღვანელის, ივან სპრაიჩის თქმით, მათი გაოცება ჭაობებით გარშემორტყმულმა ამაღლებულმა რელიეფმა გამოიწვია. სწორედ ამ ამაღლებულ რელიეფზე აღმოაჩინეს რამდენიმე დიდი შენობა, რომელთაგან ერთი 15 მეტრის სიმაღლის პირამიდაა.

მაიას ტომი, რომელიც ცნობილია მოწინავე მათემატიკური კალენდრებით, დედამიწის დასავლეთ ნახევარსფეროს ერთ-ერთ უდიდეს ცივილიზაციად ითვლებოდა. დასახლებული იყო სამხრეთ-აღმოსავლეთ მექსიკაში და ცენტრალური ამერიკის ნაწილებში. არსებობას კი ესპანელთა მიერ იუკატანის ნახევარკუნძულის დაპყრობამდე განაგრძობდა.