საავტორო მუსიკა თეატრალური პერფორმანსებისთვის, კინოსთვის, ჯგუფისთვის  - გაიცანით ნათია მაღლაკელიძე შთამბეჭდავი კარიერით

წერს მუსიკას კინოფილმებისთვის, თეატრალური პერფორმანსებისთვის, არის მიწვეული მუსიკოსი საქართველოსა და ევროპის სხვადასხვა სცენებზე - ეს მევიოლინე და კომპოზიტორი ნათია მაღლაკელიძეა, რომლის შთამბეჭდავი ისტორია ბევრი ჩვენგანის შთაგონება შეიძლება გახდეს.

ნათია Ambebi.ge-ს უამბობს, რომ მისი მუსიკალური გზა რობი კუხიანიძე და ჯგუფ ,,Outsider-ის“ წევრობით დაიწყო. როგორც თავად აღწერს, „ვიოლინო საოცარი ინსტრუმენტია, რომელსაც შეუძლია შენი ემოციებით, შენი ხმით ისაუბროს; გამოხატოს, თანაუგრძნოს, ააღელვოს თუ დაამშვიდოს ადამიანი - „ვფიქრობ, რომ მას განსაკუთრებული ზემოქმედების ძალა აქვს“.

ფოტოს ავტორი: ხატია მაღლაკელიძე

,,ბევრ ძალიან კარგ ქართველ და უცხოელ მუსიკოსთან ერთად ვუკრავდი. კონცერტის ჩასატარებლად მიწვეული ვიყავი ევროპის ქვეყნებში: გერმანია, ნიდერლანდები, ესტონეთი, იტალია და სხვა, ვმონაწილეობდი ტელეპროექტებში, ფესტივალებზე, კონცერტებზე... ყოველი მოგზაურობა, ყოველი შეხვედრა ახალ აუდიტორიასთან მზრდიდა როგორც მუსიკოსს, როგორც შემსრულებელს და ახალ იდეებს ბადებდა ჩემში“, - გვიამბობს ნათია.

ნათია ჯგუფ Four Lines-თან ერთად არის ავტორი ალბომის Sound of Wind, რომლის პრეზენტაციაც საერთაშორისო ფესტივალზე - Tallinn Music Week შედგა. ეს არის მასშტაბური ფესტივალი, სადაც უამრავი ქვეყნიდან ჩამოდიან მუსიკოსები და მსმენელები. ნათია მაღლაკელიძე გვიამბობს, რომ ქართველი მუსიკოსების ფესტივალზე გამოჩენამ ხალხის დიდი ინტერესი გამოიწვია. მისი ინფორმაციით, ფესტივალის 14-წლიან ისტორიაში საქართველო მხოლოდ ერთხელ იღებდა მონაწილეობას, და მეორეჯერ, წლების შემდეგ ჯგუფი - Four Lines გამოჩნდა მის შემსრულებელთა სიაში.

ფოტოს ავტორი: ხატია მაღლაკელიძე

ჯგუფის შექმნის ისტორია უკავშირდება ნიდერლანდელ ტურისტს, რომელიც ნათიას კარიერაში ერთ-ერთი მნიშვნელოვანი გმირია:

„საღამოობით ბარში სხვადასხვა კომპოზიციის შესრულების დროს მე და ნანა ყურაშვილს (პიანისტი) ჰოლანდიელმა ტურისტმა მოგვისმინა. ამ ადამიანმა ძალიან დიდი ინტერესი და ყურადღება გამოიჩინა ჩვენ მიმართ, რამდენიმე დღეში გვითხრა რომ გვეფიქრა ალბომის ჩაწერაზე, რომელსაც თვითონ დააფინანსებდა. მე და ნანამ შემოვიერთეთ ჩემი დები და ასე დაიბადა Four lines, შეიქმნა საავტორო მუსიკა. ჯგუფში ოთხი წევრი ვართ, ოთხი განსხვავებული ინსტრუმენტით,:აკუსტიკური ვიოლინო, ფორტეპიანო, ფლეიტა და ელექტრო ,,Seaboard Rise”. ტურისტმა გვთხოვა, უცნობად დარჩენილიყო საზოგადოებისთვის და მისი სახელი და გვარი არ გაგვემჟღავნებინა“, - გვიამბობს ნათია მაღლაკელიძე.

მისი კარიერა ჯგუფის წევრებთან ერთად მოიცავს ისეთ მნიშვნელოვან ეპიზოდს, როგორიც არის მუსიკის შექმნა ფილმისთვის „აპოლო ჯავახეთი“, რომლის მსოფლიო პრემიერა ამსტერდამის IDFA დოკუმენტური ფილმების ფესტივალზე შედგა.

ნათიამ ჯგუფ Four Lines თან ერთად შექმნა მუსიკა ფილმისთვის ,,გუშაგები”, რეჟისორი სანდრო სულაძე. ფილმი მარსელის კინოსა და მუსიკის ფესტივალმა საკონკურსო სექციაში აირჩია და ნათია ჯგუფის წევრებთან ერთად ფესტივალზე მიიწვია. ღონისძიების ფარგლებში გაიმართა მსოფლიოს სხვადასხვა ქვეყნის კომპოზიტორთა კონფერენცია, სადაც ნათიამ საკუთარი შემოქმედება მსოფლიოს სხვადასხვა კუთხიდან მოწვეულ კომპოზიტორებთან ერთად წარადგინა.

„ფილმის მუსიკაზე მუშაობის პროცესი ინდივიდუალური და უნიკალურია. კინოს დიდი სიყვარული და მის შექმნაში მონაწილეობის მიღება ყოველთვის იყო ჩემი ოცნება. ახლა კი, როცა ნამდვილად ამის ნაწილი გავხდი, ფილმის მუსიკაზე მუშაობის დროს მთლიანად იმ სამყაროში გადავდივარ და იქ ვცხოვრობ“, - აღნიშნავს ის.

ფოტოს ავტორი: ხატია მაღლაკელიძე

ნათიას კარიერასა და მის წარმატებაში უდიდესი როლი აქვს ოჯახს. როგორც მან ჩვენთან საუბარში აღნიშნა, მუსიკალური ჯგუფი Four Lines-ც მისი ოჯახია:

„ეს ისეთი ნამდვილი, გულწრფელი, ძლიერი ძალაა, რომელიც ყველა გამოწვევის გადალახვაში მეხმარება“, - აღნიშნა მან.

ნათია მაღლაკელიძე ამჟამად ცხოვრობს ნიუ-იორკში და ახალი ალბომისთვის კომპოზიციებზე მუშაობს.

„ეს ის პროცესია, რომლის დროსაც ყველა ფიქრი, ქმედება მხოლოდ მუსიკაშია. უახლოეს მომავალში ალბომის პრეზენტაციას და კონცერტს ვგეგმავ ნიუ-იორკში. ჩემი სამომავლო გეგმებიც ამ ქალაქს უკავშირდება“, - აღნიშნა მან.