"ტიტანიკის" ნამსხვრევების სანახავად ექსპედიციაში წასული ტურისტული წყალქვეშა ნავი ატლანტის ოკეანეში გაუჩინარდა - რას წერს მედია დაკარგულებზე
კანადაში ნიუფაუნდლენდის სანაპიროსთან, "ტიტანიკის" ნამსხვრევების სანახავად ექსპედიციაში წასული ტურისტული წყალქვეშა ნავი დაიკარგა.
ამჟამად მიმდებარე ტერიტორიაზე სამძებრო ოპერაცია მიმდინარეობს.
ჯერჯერობით მედიისთვის უცნობია, რამდენი ადამიანი იმყოფება ბორტზე, თუმცა ცნობილია, რომ ნავი ხუთ ადამიანს იტევს. ოპერატორი კომპანია ამბობს, რომ სამძებრო ეკიპაჟი ტურისტების პოვნასა და მათ უსაფრთხოდ დაბრუნებაზე მუშაობს.
"მთელი ყურადღება ტურისტებისა და მათი ოჯახებისკენაა მიმართული“, - ნათქვამია OceanGate-ის განცხადებაში.OceanGate Expeditions, კერძო კომპანიაა, რომელიც წყალქვეშა მოწყობილობებს ზღვაში ექსპედიციებისთვის იყენებს. ტურისტებს ექსპედიციაში მონაწილეობისთვის $250,000 გადახდა უწევთ.
მათივე განცხადებით, "ტიტანიკის" ნამსხვრევებამდე ჩასვლას და უკან დაბრუნებას ჯამში რვა საათი სჭირდება.
"ტიტანიკი" ატლანტის ოკეანის ფსკერზე, 3,800 მეტრის სიღრმეზეა. სამგზავრო ლაინერი, რომელიც თავისი დროის უდიდესი გემი იყო, 1912 წელს, საუთჰემპტონიდან ნიუ-იორკში, პირველი მოგზაურობისას აისბერგს შეეჯახა. ბორტზე მყოფი 2200 მგზავრიდან 1500-ზე მეტი დაიღუპა.