"ათობით ბავშვს, მშობელს, დამსვენებლებს ქვებით და საღებავებით გვებრძოდნენ" - დაძაბულობა ბორჯომში: რა ფოტოებს აქვეყნებს ზურაბ ჯაფარიძე?
დილიდან, ბორჯომის სასტუმროსთან, სადაც "გირჩი-მეტი თავისუფლების" პარტიის ტრენინგი უნდა ჩატარებულიყო, ხმაურია. პარტიის ინფორმაციით, ადგილზე 60-მდე პირი მივიდა, რომლებიც აგრესიულად იქცეოდნენ. მათ შორის იყო ვატო შაქარიშვილი.
ტრენინგზე მყოფების ახლობლები სოციალურ ქსელში ავრცელებენ ფოტოებს, სადაც ჩანს, რომ მობილიზებულმა ჯგუფის წევრებმა მათ ავტომობილებს საღებავები ესროლეს.
"ათობით ბავშვს, მშობელს, სასტუმროს დამსვენებლებს, მეპატრონეებს ქვებით და საღებავებით გვებრძოდნენ ორკები, მანქანა დამილეწეს ამ გმირებმა, ეს ხალხი უსაფრთხო არაა. ესენი ორგანიზებული დამნაშავეები არიან", - წერს ადგილზე მყოფი როკო მწყერაშვილი.
"ბავშვებს მიუვარდნენ ბანაკში ორკები, თუ არ წახვალთ, საღამოს უარესს დაგმართებთო, ემუქრებიან ბავშვებს!. პატარებს ასროლინებენ ქვებს!!! ჩვენიანს ჩაულეწეს მანქანა!" - წერს ზურაბ ჯაფარიძე და ადგილიდან ფოტოებსაც ავრცელებს.
ქვების სროლის ფაქტს უარყოფს ადგილზე მყოფი ვატო შაქარაშვილი. მისი თქმით, არანაირი არანაირ ძალადობას ადგილი არ ჰქონია.
"საქართველო უპირველეს ყოვლისას" მხარდამჭერები არ შეეგუებიან ახალგაზრდების მოწამლას "გირჩი- მეტი თავისუფლების" მიერ. ძალადობა არის ის, რასაც ზურაბ გირჩი აკეთებს, რასაც თქვენი ტელევიზია აკეთებს" - ამბობს შაქარიშვილი.
- შეგახსენებთ, მანამდე, დღეს დილით "გირჩი მეტი თავისუფლების“ ლიდერს, ზურაბ ჯაფარიძეს გორში თავს დაესხნენ.
როგორც ცნობილი გახდა, ავტომანქანაში მყოფ ზურაბ ჯაფარიძეს ერთი პირი თავს დაესხა და თვალის არეში დაზიანება მიაყენა. ჯაფარიძე პოლიციამ უკვე გამოკითხა.
ჯაფარიძეზე თავდასხმას შაქარიშვილი სოციალურ ქსელშიც გამოეხმაურა:
"ზურა გირჩი შარვალჩახდილ ჯაფარიძე მიდიოდა ბორჯომში ახალგაზრდების მოსაწამლად (ტრენინგის ჩასატარებლად). გორში “სმარტში” გაჩერდა, ერთი ქართველი კაცი მიუახლოვდა, თუ შეიძლება შუშას ჩაუწიე, რაღაც მაქვს სათქმელიო… ჩამოწია გირჩმაც, იფიქრა მესალმებაო და ცხვირ-პირში მოხვდა, ეს იმისთვის, ჩვენს პატრიარქს და ეკლესიას რომ შეურაცხყოფას აყენებო და წავიდა თავის გზაზე ის კარგი კაცი… ზურა დარჩა შარვალჩახდილი და მოუწია უკან თბილისში დაბრუნება! დარჩნენ ბავშვები “განათლების” გარეშე…" - დაწერა ვატო შაქარიშვილმა.
წაიკითხეთ ასევე: