საბერძნეთში, მიგრანტების ჩაძირულ ნავზე 100-ზე მეტი ბავშვი იმყოფებოდა - ვრცელდება ინფორმაცია, რომ ტრეფიკინგის ბრალდებით 9 ადამიანი დააკავეს
საბერძნეთის სანაპიროებთან მიგრანტების ნავის ჩაძირვის შედეგად სულ მცირე 79 ადამიანი დაიღუპა. არსებული ინფორმაციით, ნავზე 750-მდე ადამიანი იმყოფებოდა, აქედან 100-ზე მეტი კი ბავშვია. მაშველები გადარჩენილებს ჯერ კიდევ ეძებენ.
ბერძნული მედიის ცნობით, ტრეფიკინგის ბრალდებით ცხრა ადამიანი, მათ შორის რამდენიმე ეგვიპტელი დააკავეს. სანაპირო დაცვამ განაცხადა, რომ ოთხშაბათს, გამთენიისას, ნავს ძრავა გაუფუჭდა. მგზავრებმა გადაადგილება დაიწყეს, რამაც მისი ჩაძირვა გამოიწვია. გადარჩენილი 104 ადამიანიდან, ყველა მამაკაცი იყო.
ნავი ლიბიიდან იტალიაში მიდიოდა, ბორტზე მყოფთა უმეტესობა ახალგაზრა მამაკაცი იყო. ნავი პილოსის სამხრეთ-დასავლეთით დაახლოებით 80 კილომეტრში ჩაიძირა.
მომხდართან დაკავშირებით საბერძნეთში სამდღიანი გლოვაა გამოცხადებული. წინასაარჩევნო კამპანია შეჩერებულია, ხოლო ხუთშაბათს დაგეგმილი სატელევიზიო დებატები - გაუქმებული.