31 წლის ნიკოლოზ ლაჩაშვილს, რომელიც ყოფილი მეუღლის დამამძიმებელ გარემოებაში ჩადენილი მკვლელობისთვის დააკავეს, ბრალი წარედგინა

საქართველოს პროკურატურამ ყოფილი მეუღლის დამამძიმებელ გარემოებაში ჩადენილი განზრახ მკვლელობის ფაქტზე, 31 წლის ნიკოლოზ ლაჩაშვილის ბრალდება წარუდგინა. ამის შესახებ ინფორმაციას პროკურატურის პრესსამსახური ავრცელებს.

"შინაგან საქმეთა სამინისტროს მიერ ჩატარებული გამოძიებით დადგინდა, რომ 4 ივნისს, თბილისში, ბრალდებულმა გენდერის ნიშნით შეუწყნარებლობის მოტივით, ყოფილი მეუღლე თოკის გამოყენებით დაახრჩო. ბრალდებულმა კვალის დაფარვის მიზნით, გვამი ავტომანქანის საბარგულში მოათავსა, სხვა ტერიტორიაზე გადაიტანა და ხევში გადააგდო.

სამართალდამცველებმა ბრალდებული 6 ივნისს დააკავეს. მას ბრალდება საქართველოს სისხლის სამართლის კოდექსის 11 პრიმა 109-ე მუხლის „თ“, და „კ“ ქვეპუნქტებით (განზრახ მკვლელობა, ჩადენილი გენდერის ნიშნით, ოჯახის წევრის მიმართ) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.

პროკურატურა, ბრალდებულის მიმართ აღკვეთის ღონისძიების სახით პატიმრობის გამოყენების შუამდგომლობით, სასამართლოს კანონით დადგენილ ვადაში მიმართავს“, - აღნიშნულია პროკურატურის მიერ გავრცელებულ ინფორმაციაში.

წაიკითხეთ ასევე:

• "მარიტას მამა შარშან დაეღუპა და დედა ემიგრაციაში წავიდა... 2-3 დღე გაუჩინარებული იყო და ახლობლები ეძებდნენ" - რას ჰყვება, სავარაუდოდ, ყოფილი ქმრის მიერ მოკლული ქალის ახლობელი
• ადვოკატი 31 წლის ნიკოლოზ ლაჩაშვილის მიმართ, რომელსაც ყოფილი ცოლის მოგუდვა, შემდეგ კი ხევში გადაგდება ბრალდება, ფსიქიატრიული ექსპერტიზის დანიშვნას მოითხოვს