"სროლის ხმა რომ გავიგონე, ბავშვი დავაწვინე იატაკზე" - გავრცელებული ინფორმაციით, ვაკეში შეცდომით სხვა პირს ესროლეს: რას ჰყვება თვითმხილველი (ვიდეო)

ცოტა ხნის წინ ვაკეში სროლა იყო. თვითმხილველების ინფორმაციით, შემთხვევა მოსაშვილის ქუჩაზე მდებარე ერთ-ერთ კაფეში მოხდა. როგორც ისინი ამბობენ, ერთმა პირმა მეორეს დაახლოებით შვიდჯერ ესროლა.

"რუსთავი 2"-ის ინფორმაციით, კაფეში დაჭრილი პირი გუგა ფირცხალავაა, რომელიც სხვა პიროვნებაში შეეშალათ. იგი ამ დროისთვის კლინიკაშია გადაყვანილი.

"ვისხედით კოფი-შოფში, გავიგონე სროლის ხმა ერთი, ორი, დავაწვინე ბავშვი იატაკზე, დავაწექი ზემოდან. მესამე, მეოთხე, მეხუთე სროლის ხმაც მახსოვს. ძალიან შემეშინდა. ქვემოთ რომ ვიწექი, ჩვენს წინ ახალგაზრდა ბიჭი დავინახე რომ გარბოდა ძალიან სწრაფად" - ამბობს ერთ-ერთი თვითმხილველი.

შინაგან საქმეთა სამინისტრომ თბილისში, მოსაშვილის ქუჩაზე, ერთ-ერთ კაფეში მომხდარი სროლის საქმეზე გამოძიება ორი მუხლით დაიწყო - 19/108-ე და 236-ე მუხლებით მიმდინარეობს, რაც განზრახ მკვლელობის მცდელობას და ცეცხლსასროლი იარაღის უკანონო შეძენა, შენახვა, ტარებას გულისხმობს.

ნახეთ ვიდეო