"19 მაისს ეკონომიკის მინისტრი უნდა გამოცხადებულიყო პარლამენტში და არ მოვიდა - 19-ში კორონავირუსნიშნიანი 22-ში კატარში პრემიერთან ერთად გაფრინდა" - რომან გოცირიძე
19 მაისს ეკონომიკის მინისტრი უნდა გამოცხადებულიყო პარლამენტში ანაკლიის საკითხებზე და არ მოვიდა - პარლამენტის ხელმძღვანელობამ გვაცნობა, რომ მინისტრი ავადაა. პარლამენტის აპარატში გვითხრეს, რომ მან წარმოადგინა ცნობა იმის შესახებ, რომ "კორონავირუსის ნიშნები” აქვს. ჰო და, 19-ში კორონავირუსნიშნიანი 22-ში გაფრინდა კატარში პრემიერ-მინისტრთან ერთად,- ამის შესახებ ოპოზიციონერი დეპუტატი რომან გოცირიძე სოციალურ ქსელში წერს.
როგორც ის აღნიშნავს, ხელისუფლებას არ აწყობდა ანაკლიის შესახებ საუბარი, განსაკუთრებით სავარაუდო ინვესტორების შესახებ.
"19 მაისს ეკონომიკის მინისტრი უნდა გამოცხადებულიყო პარლამენტში ანაკლიის საკითხებზე. არ მოვიდა და საკითხის განხილვა გადაიდო ოთხი თვით, 29 სექტემბრისათვის, რადგან საზაფხულოდ პარლამენტი მუშაობას წყვეტს და რეგლამენტით ე.წ. ინტერპელაციის წესით პირის დაბარება არ ხდება ივნისისა და დეკემბრის თვეში.
პარლამენტის ხელმძღვანელობამ გვაცნობა, რომ მინისტრი ავადაა. პარლამენტის აპარატში გვითხრეს, რომ მან წარმოადგინა ცნობა იმის შესახებ, რომ “კორონავირუსის ნიშნები” აქვს. ჰო და, 19-ში კორონავირუსნიშნიანი 22-ში გაფრინდა კატარში პრემიერ-მინისტრთან ერთად.
გაირკვევა ყველაფერი, ჩვენს მიერ გამოთხოვილი იქნება ტესტირების შედეგები. შეიძლება მართლაც ისე იყო, როგორც ამბობენ, მაგრამ ხელისუფლებას არ აწყობდა ამ ვითარებაში ანაკლიის შესახებ საუბარი, განსაკუთრებით სავარაუდო ინვესტორების შესახებ, რადგან ეჭვი გვაქვს, რომ იქ არ იქნებიან დასავლური კომპანიები. გავიხსენოთ ივანიშვილის ცნობილი გამონათქვამი, "ამერიკელებს შავ ზღვაში რა უნდათ”?!
მინისტრი რომ არ მოვიდა და ის საეჭვო ცნობა მაჩვენეს(მე ვიყავი მომხსენებელი პარლამენტში), დავიჯერე, არც კი ჩამიხედავს. ახლა უფრო ღრმად შევისწავლი იმ ქაღალდს“,-წერს გოცირიძე.