20
მაისიდღის ზოგადი ასტროლოგიური პროგნოზი
ბელგოროდში რუსეთის ფედერაციის უსაფრთხოების ფედერალური სამსახურის შენობას დაარტყეს, - ინფორმაციას უკრაინული მედია "ტელეგრამ“ არხებზე დაყრდნობით ავრცელებს.
ქალაქის თავზე ამომავალი კვამლის ფოტოები და ვიდეოები რუსულმა ონლაინ გამოცემამ SOTA-მ "ტელეგრამზე“ გამოაქვეყნა.
"ბელგოროდში "ეფ-ეს-ბეს“ შენობას დაარტყეს. ქალაქში შემოღებული კონტრტერორისტული ოპერაციის რეჟიმის გამო, რეგიონში აკრძალულია ნებისმიერი პუბლიკაცია ოფიციალური წყაროების მითითების გარეშე", - ნათქვამია ინფორმაციაში.
ამასთანავე, ბელგოროდის "ტელეგრამ" არხებმა გაავრცელეს ინფორმაცია, რომ გუშინ, ადგილობრივი დროით, დაახლოებით 23:20 საათზე ქალაქის ცენტრში ძლიერი აფეთქება მოხდა, რის შემდეგაც კვამლის სვეტი გაიზარდა. მოგვიანებით გაჩნდა ინფორმაცია პრეობრაჟენსკაიას ქუჩის გადაკეტვის შესახებ, შემთხვევის ადგილზე მეხანძრეები, პოლიციელები და სასწრაფო დახმარების მანქანები მივიდნენ.
რუსული "ტელეგრამ“ არხი "რიბარი“ კი იუწყება, რომ თავდასხმის სამიზნე იყო არა მხოლოდ რუსეთის ფედერაციის უსაფრთხოების ფედერალური სამსახურის შენობა, არამედ რუსეთის ფედერაციის შინაგან საქმეთა სამინისტროს განყოფილებაც.
შეგახსენებთ, 22 მაისს, შუადღიდან გავრცელდა ინფორმაცია, რომ რუსეთის ფედერაციის ბელგოროდის ოლქში დივერსიული ჯგუფები უკრაინელი სამხედროების დახმარებით შეიჭრნენ. თავდაპირველად, რუსები ინფორმაციას უარყოფდნენ და ამბობდნენ, რომ "ეს მოწინააღმდეგის "პიარ სვლა“ იყო, რომლის მიზანიც ბახმუტის დაკარგვის გადაფარვაა", თუმცა მოგვიანებით იძულებული გახდნენ, მომხდარი ეღიარებინათ.
უკრაინის ხარკოვის და სუმის ოლქებთან მოსაზღვრე გრაივორონსკის რაიონის მცხოვრებთა ევაკუაცია 22 მაისს დაიწყო, მას მერე, რაც ბელგოროდის გუბერნატორმა ვიაჩესლავ გლადკოვმა გამოაცხადა, რომ ოლქის ტერიტორიაზე შეაღწია "უკრაინის შეიარაღებული ძალების სადაზვერვო-დივერსიულმა ჯგუფმა“ და მისი ლიკვიდაციისთვის "კონტრტერორისტული ოპერაცია“ მიმდინარეობს. უკრაინა ბელგოროდის ოლქზე შეტევასთან კავშირს უარყოფს.
გავრცელებული ინფორმაციით, რუსეთის ტერიტორიაზე "რუს მოხალისეთა კორპუსის“ და "თავისუფლება რუსეთის“ ლეგიონის წევრები უკრაინის ტერიტორიიდან შეიჭრნენ. ბელგოროდის ოლქის ტერიტორიაზე მათ გამოიყენეს რამდენიმე ჯავშანტრანსპორტიორი, ორი ტანკი და ერთი BTR.
ბელგოროდის ოლქის გუბერნატორმა გრაივორონსკის რაიონიდან ევაკუირებულ მოქალაქეებს მოუწოდა, ჯერჯერობით თავი შეიკავონ სახლებში დაბრუნებისგან, რადგან, როგორც ის ამბობს, "კონტრტერორისტული ოპერაცია“ არ დასრულებულა. მის მიერ დღეს დილით, "ტელეგრამით" გავრცელებული ცნობით, "რუსეთის თავდაცვის სამინისტრო ძალოვან სტრუქტურებთან ერთად განაგრძობს ტერიტორიის გაწმენდას“.
დიდი ბრიტანეთის თავდაცვის სამინისტროს დაზვერვის ინფორმაციით, 19-22 მაისის პერიოდში რუსეთის ძალების და პარტიზანების შეტაკებები მოხდა უკრაინის საზღვართან მდებარე ბელგოროდის ოლქის სულ მცირე, სამ ლოკაციაზე. ბრიტანელების თქმით, პარტიზანების ვინაობა დადასტურებული არ არის, თუმცა ცნობილია, პასუხისმგებლობა მომხდარზე აიღეს პუტინის რეჟიმის მოწინააღმდეგე რუსულმა ჯგუფებმა. მათივე ინფორმაციით, ყველაზე სერიოზული ინციდენტი მოხდა გრაივორონსკის რაიონის ადმინისტრაციული ცენტრის, ქალაქ გრაივორონის სიახლოვეს.
ბრიტანული დაზვერვა აღნიშნავს, რომ სასაზღვრო რეგიონებში რუსეთი სულ უფრო სერიოზულ პრობლემებს აწყდება - სამხედრო თვითმფრინავების ჩამოგდებას, რკინიგზაზე აფეთქებებს და სხვა ინციდენტებს, ახლა უკვე პარტიზანების აქტიურობაც დაემატა.
დაზვერვისვე შეფასებით, რუსეთმა უკრაინასთან მოსაზღვრე რაიონებში მომხდარი ინციდენტები შეიძლება გამოიყენოს ოფიციალური ვერსიის მხარდასაჭერად, რომ ის "ომის მსხვერპლია“.
იხილეთ ასევე:
ძალიან სახიფათო მანევრია. ეს უფრო აწყობთ ოკუპანტებს თავისი ქმედებების გასამართლებლად. არ ვარ დარწმუნებული ეს დაეგეგმათ უკრაინაში. ხალხის გაწირვაა და მეტი არაფერი.
ეს რუსეთუმეებს ეჩვენებათ! სინამდვილეში "უძლეეველი" ურდოა! ჰა ჰა ჰა!