"არ გამოიყენოთ "ზელიონკა", ასპირინი და იბუპროფენი..." - როგორ მოვუაროთ ბავშვს "ჩუტყვავილას" დროს და რატომ არ შედის ვაქცინაციის კალენდარში აღნიშნული დაავადება?

რიგ სამედიცინო დაწესებულებაში, ჩუტყვავილით და ქუნთრუშით ინფიცირებული ბავშვების მიმართვიანობა გაიზარდა. მედიცინის დოქტორმა თამარ ობგაიძემ განუცხადა, მატება მხოლოდ საქართველოსთვის არ არის დამახასიათებელი.

პედიატრის განმარტებით, ჩუტყვავილა გამოწვეულია ჰერპესის ჯგუფის ვირუსით, მისთვის დამახასიათებელია მრავალფეროვანი ტიპის, განსაკუთრებით ბუშტუკოვანი გამონაყარი, ქავილი და ტემპერატურა. რაც შეეხება ქუნთრუშას, პედიატრის ინფორმაციით, მისი გამომწვევია A-ჯგუფის β-ჰემოლიზური სტრეპტოკოკი, რომელსაც ჰაერწვეთოვანი გზით გადამდებლობა ახასიათებს. (წაიკითხეთ:პედიატრების აცხადებენ, რომ რიგ სამედიცინო დაწესებულებაში, ჩუტყვავილით და ქუნთრუშით ინფიცირებული ბავშვების მიმართვიანობა გაიზარდა)

გუშინ გორში მომხდარმა ტრაგედიამ საზოგადოება გარკვეულწილად დაზაფრა და უამრავი მშობელი დღეს ჩუტყვავილას ვაქცინის შესახებ ინფორმაციის მიღებას ცდილობდა. თუმცა უნდა აღინიშნოს, რომ საქართველოს ეროვნული ვაქცინაციის კალენდარში "ჩუტყვავილა" არ შედის.

რატომ არ შედის ვაქცინაციის კალენდარში "ჩუტყვავილა"?

ამაზე წლების განმავლობაში გარკვეულ განმარტებას აკეთებდა დაავადებათა კონტროლის ეროვნული ცენტრის ხელმძღვანელის მოადგილე პაატა იმნაძე. მისი თქმით, ჩუტყვავილას საწინააღმდეგო ვაქცინაცია ამერიკის გარდა სავალდებულო არსად არ არის, ევროპის ქვეყნებშიც კი ეს კონკრეტული ვაქცინა არის მოთხოვნით და ამის მიზეზი ის არის, რომ დაავადება ძალიან მსუბუქად მიმდინარებს.

"ეს არის ძალიან სუსტი დაავადება და წლები ისე გადის, რომ მძიმე შემთხვევა არ ფიქსირდება. ვაქცინაცია რომ დაიწყოს ბავშვებში, დაავადება მოზრდილებში გადაინაცვლებს და ბევრი მძიმე შემთხვევა გვექნება, რადგან მაშინ უნდა მოინახოს ყველა არაიმუნური მოზრდილი და აიცრას", - აცხადებდა პაატა იმნაძე.

როგორ მოვუაროთ ბავშვს "ჩუტყვავილას" დროს? (ექიმ არჩილ მარშანიას რჩევები)

ეს არის მწვავე, მარტივად გადამდები ვირუსული დაავადება, რომელიც უმეტესწილად მსუბუქად მიმდინარეობს, თუმცა, იშვიათ შემთხვევებში, შესაძლოა ახასიათებდეს ისეთი მძიმე გართულებები, როგორიცაა კანისა და რბილი ქსოვილების ბაქტერიული ინფექციები, თავის ტვინის ანთება, სეფსისი და სხვა.

სამწუხაროდ, ჩუტყვავილას საწინააღმდეგო ვაქცინა საქართველოს ეროვნულ კალენდარში არ შედის, ამიტომ მისი პრევენციის გზა პირად ჰიგიენასა და ინფიცირებულებისგან დისტანციის შენარჩუნებაზე გადის.

ძირითადი სიმპტომები, რომელიც ახასიათებს ჩუტყვავილას:

• სითხით სავსე ბუშტუკებიანი გამონაყარი, რომელიც ჩნდება სახეზე, გულმკერდზე და ზურგზე, შემდეგ კი ვრცელდება მთლიან სხეულზე;
• მაღალი ტემპერატურა;
• დაღლილობა;
• მადის დაქვეითება;
• თავის ტკივილები.

რა შეიძლება გავაკეთოთ სახლის პირობებში, თუ ბავშვს აქვს ჩუტყვავილა:

ბავშვი გყავდეთ სახლში, სანამ გამონაყრის გავრცელება არ შეჩერდება და არსებული გამონაყარი არ გაიკეთებს "ფუფხს", რათა შევამციროთ გავრცელების არეალი. ამას დაახლოებით 1 კვირა დასჭირდება;

გააკეთეთ კოლოიდური შვრიის ფაფის აბაზანა, ნელთბილი (არა ცხელი) წყლით. გაითვალისწინეთ, რომ მაღაზიაში ნაყიდი, საჭმელი შვრიის ფაფა არ გამოდგება, ამისთვის საჭიროა წმინდად დაფქული, კოლოიდური შვრიის ფხვნილი, რომელიც შესაძლებელია შეიძინოთ აფთიაქში ან ონლაინ მაღაზიებში;

არ გამოიყენოთ ბრილიანტის მწვანე, ე.წ. ზელიონკა;

კანზე გამოიყენეთ კალამინის ლოსიონი, პეტროლეუმ ჯელი (თეთრი ვაზელინი) ან ქავილის საწინააღმდეგო ლოსიონი პარფიუმის გარეშე (Frangrance-free / Perfume-free);

არ გამოიყენოთ ანტიბიოტიკის შემცველი მალამო ექიმის დანიშნულების გარეშე;

ტემპერატურა მართეთ პარაცეტამოლით (არ გამოიყენოთ ასპირინი ან იბუპროფენი);

ქავილის საწინააღმდეგოდ შესაძლოა გამოყენებული იყოს ურეცეპტოდ გაყიდვადი ანტიჰისტამინური მედიკამენტი (დასალევი, არა კანზე წასასმელი), რომელსაც გამოიყენებთ ანოტაციის მიხედვით;

ეცადეთ, ბავშვს არ ჰქონდეს გრძელი ფრჩხილები, ქავილისას მეორადი დაზიანების პრევენციისთვის.

ნებისმიერი შეკითხვის ან გართულების არსებობის შემთხვევაში მიმართეთ ექიმს.