აზერბაიჯანის თავდაცვის სამინისტრო სომხურ მხარეს აზერბაიჯანის პოზიციების წინააღმდეგ საბრძოლო დრონების გამოყენებაში ადანაშაულებს
აზერბაიჯანის თავდაცვის სამინისტრო სომხეთის შეიარაღებულ ძალებს აზერბაიჯანის არმიის პოზიციების წინააღმდეგ საბრძოლო უპილოტო საფრენი აპარატების გამოყენებაში ადანაშაულებს.
"18 მაისს, დაახლოებით, 07:15 საათზე, სომხეთის შეიარაღებულმა ძალებმა აზერბაიჯანის არმიის ქალბაჯარის რაიონის ელიჯას დასახლების მიმართულებით განლაგებული რამდენიმე პოზიციის წინააღმდეგ საბრძოლო უპილოტო საფრენი აპარატები გამოიყენეს“, - აღნიშნულია თავდაცვის სამინისტროს განცხადებაში.
უწყების მტკიცებით, ტერიტორიის დათვალიერებისას აღმოჩენილია ხელნაკეთი ჭურვების ნარჩენები, რომლებსაც სომხები უპილოტო საფრენი აპარატებისთვის იყენებდნენ.
"აზერბაიჯანის არმიის ქვედანაყოფებს ზარალი არ განუცდიათ და საპასუხო ზომები მიიღეს. რეგიონში შექმნილ დაძაბულობაზე მთელი პასუხისმგებლობა სომხეთის სამხედრო-პოლიტიკურ ხელმძღვანელობას ეკისრება“, - აღნიშნულია თავდაცვის სამინისტროს განცხადებაში.