არველაძის "მოთხრობები ქართლიდან“ - მწერალი ცნობილი ოჯახიდან და წიგნი, რომელიც უნდა წაიკითხოთ
სულ მალე ქართველი მკითხველი ახალ ავტორს გაიცნობს - გამომცემლობა პალიტრა L რევაზ-გიორგი არველაძის "მოთხრობები ქართლიდან“ გამოსცემს.
26 წლის რევაზ-გიორგი არველაძის პროფესიული ბიოგრაფია რეჟისურასა და ვიდეომემონტაჟის საქმიანობას მოიცავს, თუმცა ამჯერად ქართულ საზოგადოებას მას წარვუდგენთ როგორც მწერალს - რეზი ქართულ მითოლოგიაზე შექმნილი მოთხრობების კრებულის ავტორია.
რევაზ-გიორგი არველაძე 1996 წლის 23 ნოემბერს თურქეთში (ტრაპზონში) დაიბადა. მამის, არჩილ არველაძის საფეხბურთო კარიერის გამო პირველი ექვსი წელი სამშობლოში არ უცხოვრია - თურქეთის შემდეგ იყო ნიდერლანდი (ბრედა), მერე გერმანია (კიოლნი).
ექვსი წლის იყო, ოჯახთან ერთად საქართველოში რომ დაბრუნდა. ჯერ წმინდა გიორგის სახელობის კერძო სკოლაში სწავლობდა, შემდეგ კი გივი ზალდასტანიშვილის სახელობის ამერიკულ აკადემიაში. შეიძლება ითქვას, რომ მისი სამომავლო გეგმები ბავშვობიდანვე დაუკავშირდა ამერიკას და ამდენად, ამერიკული აკადემიის დამთავრების შემდეგ სწავლა ოჰაიოს შტატში Dension University-ში გააგრძელა ინგლისური ლიტერატურისა და კინემატოგრაფიის მიმართულებით. სამაგისტრო პროგრამა კი უკვე New York Film Academy-ში სარეჟისორო მიმართულებით გაიარა.
რეზი-გიორგი არველაძე ამჟამად ცხოვრობს და მუშაობს კალიფორნიაში. ამის მიუხედავად, სამშობლოს განცდა, მასთან კავშირი არასოდეს დაუკარგავს. ამბობს, ჩემთვის ამერიკა სამსახურთან ასოცირდება, საქართველო კი - სახლთანო. თავის გამორჩეულ ნამუშევრადაც სწორედ სამშობლოს პრობლემაზე შექმნილ ფილმს მიიჩნევს. "მცოცავი ოკუპაცია“ - ასე ჰქვია მოკლემეტრაჟიან ფილმს, რომელიც რეზიმ ორი წლის წინ გადაიღო.
რევაზ-გიორგი არველაძე:
"გადავწყვიტე გადამეღო ფილმი ჩვენთვის, ყველასთვის მტკივნეულ თემაზე - ოკუპაციაზე და განსხვავებული კუთხით ამესახა 2008 წლის ომის ტრაგედია, მისგან დატოვებული ტკივილი და განცდები. ჩემი ფილმი "მცოცავი ოკუპაცია“ რუსული პოლიტიკისა და გავლენის პრობლემაზეა, რასაც მთელი კავკასია განიცდის. ეს ფილმი ორი წლის წინ არის გადაღებული და გული მწყდება, რომ დღესაც აქტუალურია, თუმცა გვაჩვენებს რეალურ საფრთხეს, რომელსაც რუსეთი წარმოადგენს“.
ამბობს, კინოთი ხელოვნების გემო შევიგრძენი, ხელოვნება კი მიზანსა და ფორმას აძლევს ფანტაზიას და ამიტომ გადავწყვიტე მხოლოდ კინოზე არ გავჩერებულიყავიო. ჰოდა, რეზის ფანტაზიამ ამჯერად წიგნის ფურცლებზე გადაინაცვლა - "მოთხრობები ქართლიდან“ ავტორის ფანტაზიის, ქართული მითოლოგიისა და ე.წ. საშინელებათა ჟანრის ერთგვარი სინთეზია.
რეზი არველაძე:
"ყოველთვის განსაკუთრებულად გატაცებული ვიყავი მითოლოგიით, თინეიჯერობის პერიოდში დავინტერესდი საშინელებათა ჟანრის ლიტერატურით, რაც ცოტა არ იყოს, უცნაურია, მაგრამ დიდი მხარდაჭერა მივიღე დედისგან, რომელიც პატივს სცემდა ჩემს ინტერესებს და ყველაფრი გააკეთა იმისთვის, რომ ეს ინტერესები სწორი მიმართულებით წარმემართა“.
აღსანიშნავია, რომ ახალგაზრდა მწერალმა მოთხრობები ინგლისურ ენაზე დაწერა და წიგნადაც ამერიკაში გამოსცა. ამ მოთხრობებს ჩემს ქვეყანას ვუძღვნი, ამასთან, პატივს მივაგებ ჩემს ერთ-ერთ უსაყვარლეს საშინელებათა ჟანრს, განსაკუთრებით - მის მითოლოგიურ მიმართულებასო, წერს წიგნის შესავალში, ჩვენთან საუბარში კი განმარტავს, რომ წიგნის შექმნის მთავარი მიზანი ჩვენი კულტურის, ადათ-წესების, მითოლოგიისა და თქმულებების უცხოელებისთვის გაცნობა იყოო.
რეზი არველაძე:
"მოთხრობები 2017 წელს დავწერე. ისინი ქართულ მოტივებზეა დაფუძნებული და იმგვარი ელემენტებითაა დატვირთული, ამერიკელი მკითხველისთვის საინტერესო რომ იქნებოდა. მიუკიბ-მოუკიბავად რომ ვთქვა, მინდოდა ჩემი ქვეყნის მითოლოგიური არსებები წარმომეჩინა და "შეუცნობლის“ აგენტებად მექცია - შუასაუკუნეების "შემზარავის“, როგორც ჟანრისა და ლავკრაფტისეული მისტერიის ნაზავი შემექმნა“.
თუ ამერიკელი მკითხველისთვის "ჭიაკოკონობა“ და დიდგორის ბრძოლა "შეუცნობელი აგენტებია", ქართველი მკითხველისთვის "ახლობელი“ და ნაცნობი ამბებია, თუმცა ნუ იფიქრებთ, რომ ავტორი მხოლოდ მოვლენების არსის გაცნობით შემოიფარგლება - ფანტაზიის უსასრულობა, ექსპანსიურობა, მითოლოგიური იდუმალება თუ პერსონაჟის თავგადასავლის არაორდინარულობა სწორედ ის ხელწერა და სიღრმეა, შეუცნობელთან, ე.წ. ნაცნობ უცნობთან შეხვედრას რომ ჰპირდება ქართველ მკითხველს და "მოთხრობები ქართლიდან“ ამდენადაც არის საინტერესო.
მოთხრობები ქართულად ქეთი ქანთარიამ თარგმნა და შეუძლებელია არ აღინიშნოს, რომ თარგმანი მაღალპროფესიულ დონეზეა შესრულებული - ორიგინალთან ემოციური კავშირი და ავტორისეული სტილი, ხასიათი და ხელწერა ჩვენ წინაშეა პირვანდელი სახით.
დაელოდეთ რევაზ-გიორგი არველაძის მოთხრობებს ქართლიდან, თქვენ მის მიერ შექმნილ ფანტასტიკურ და იდუმალ სამყაროში მოგზაურობის დაუვიწყარი წუთები გელოდებათ!
ქართველი მკითხველისთვის წიგნისა და ავტორის წარდგენა თბილისის წიგნის საერთაშორისო ფესტივალზე შედგება.
- ავტორი: თეა ბარამაშვილი