"ერთადერთ შემთხვევაში შევწყვეტთ პროტესტს.. თუ ღარიბაშვილი სამართლებრივ აქტს მოაწერს ხელს და არაუგვიანეს 1-ელი სექტემბრისა შემოტანილი იქნება "ვოსორიტიდი" - მშობელი
ბატონო პრემიერო, გთხოვთ ისევ შეგვხვდეთ და მოაწეროთ ხელი განკარგულების აქტს, რომელიც ჩვენ გაგვაჩერებს და თქვენსას ვირწმუნებთ. ჩვენ უნდობლობას ვუცხადებთ თამარ გაბუნიას და ზურაბ აზარაშვილს, - ამის შესახებ აქონდროპლაზიის დიაგნოზის მქონე ბავშვის ერთ-ერთმა მშობელმა ჯანდაცვის მინისტრის მოადგილის თამარ გაბუნიას განცხადების საპასუხოდ აღნიშნა.
საუბარი ეხება განცხადებას, სადაც გაბუნიამ აღნიშნა, რომ სამინისტრო მზად არის, ასევე ბავშვების საუკეთესო ინტერესებიდან გამომდინარე, დაჩქარებულ ვადებში, უზრუნველყოს აქონდროპლაზიის მართვისთვის აუცილებელი პროტოკოლისა და გაიდლაინების შექმნა.
როგორც აქონდროპლაზიის დიაგნოზის მქონე ბავშვის ერთ-ერთმა მშობელმა თქვა, ისინი ერთადერთ შემთხვევაში შეწყვეტენ პროტესტს, როდესაც პრემიერ მინისტრი ირაკლი ღარიბაშვილი მოაწერს ხელს სამართლებრივ აქტს, სადაც იქნება გაწერილი ვადები და არაუგვიანეს 1-ლი სექტემბრისა შემოტანილი იქნება მედიკამენტი „ვოსორიტიდი“.
„ერთადერთ შემთხვევაში შევწყვეტთ ჩვენ საპროტესტო აქციას და წავალთ სახლში, როდესაც პრემიერ- მინისტრი ირაკლი ღარიბაშვილი მოაწერს ხელს სამართლებრივ აქტს, სადაც იქნება გაწერილი ვადები და არაუგვიანეს პირველი სექტემბრისა შემოტანილი იქნება მედიკამენტი „ვოსორიტიდი“. სხვა შემთხვევაში თამარ გაბუნიას ნათქვამის არ გვჯერა არცერთ მშობელს. ჩვენ უამრავჯერ გვაქვს მისი საუბარი მოსმენილი. როგორ უნდა დავიჯეროთ მისი ნათქვამი, როდესაც თვითონ ტყუილს ავრცელებს ამ მედიკამენტის არაეფექტურობის შესახებ და უცებ შეიცვალა ახლა ყველაფერი და თურმე დაჩქარებული წესით მუშაობენ. ამიტომ, არ დავიჯერებთ! ბატონო პრემიერო, გთხოვთ ისევ შეგვხვდეთ და მოაწეროთ ხელი განკარგულების აქტს, რომელიც ჩვენ გაგვაჩერებს და თქვენსას ვირწმუნებთ. ჩვენ უნდობლობას ვუცხადებთ თამარ გაბუნიას და ზურაბ აზარაშვილს, მან მომიყვანა ამ მდგომარეობამდე მე!“ - განაცხადა ერთ-ერთმა მშობელმა.
ცნობისთვის, ჯანდაცვის მინისტრის მოადგილემ თამარ გაბუნიამ დღეს კიდევ ერთი განცხადება გაავრცელა, სადაც აღნიშნულია რომ ნებისმიერი დესტრუქციული ქმედება და ესკალაცია საფრთხეს უქმნის აქონდროპლაზიის მკურნალობის პროტოკოლის დანერგვის პროცესს.
ამასთან, მისივე განცხადებით, უცილებელია, პროცესები კონსტრუქციულ რეჟიმს დაუბრუნდეს, რათა არ შეფერხდეს აქონდროპლაზიის მართვის სისტემის დანერგვის მიზნით მიმდინარე მოლაპარაკებები.
გაბუნია აღნიშნავს, რომ სამინისტრო მზად არის, ბავშვების საუკეთესო ინტერესებიდან გამომდინარე, დაჩქარებულ ვადებში, უზრუნველყოს აქონდროპლაზიის მართვისთვის აუცილებელი პროტოკოლისა და გაიდლაინების შექმნა.