"ნაციონალურ მოძრაობაში" არეულობაა - რაზე ვერ თანხმდებიან პარტიის ახალგაზრდული ფრთის წევრები მენეჯმენტთან: "ტყუილია, რომ ვინმე "მოვტეხეთ“
ბოლო პერიოდში, "ნაციონალურ მოძრაობაში" არეულობაა. როგორც ჩანს, პარტიის წევრები ერთმენთს ვერ უგებენ. მენეჯმენტის ხედვებთან შეუთანხმებლობის გამო, რამდენიმე დღის წინ, ხატია დეკანოიძემ პარტიიდან წასვლის გადაწყვეტილება მიიღო.
"პარტიის მენეჯმენტთან ჩემი შეუთანხმებლობის ერთ-ერთი მიზეზი იყო ძველი პარადიგმის დაბრუნება "ნაციონალურ მოძრაობაში“, რაც ვფიქრობ, გამართლებული არ არის, - ასეთი განმარტება გააკეთა ხატია დეკანოიძემ მისი გადაწყვეტილების მიზეზებზე საუბრისას.
აზრთა სხვადასხვაობაა პარტიის ახალგაზრდულ ფრთაშიც.
- "ნაციონალური მოძრაობის" ახალგაზრდული ორგანიზაციის წევრების ნაწილის განცხადებით, დღევანდელ ყრილობაზე განსხვავებული შეხედულებების გამო არ მიიწვიეს.
"ნაციონალური მოძრაობის“ ახალგაზრდული ორგანიზაციის ერთ-ერთი წევრის დიმიტრი ბიძინაშვილის განცხადებით, ცდილობენ, პარტიაში განსხვავებული აზრი მოსპონ.
"იმის მაგივრად, რომ ამ ადამიანებმა ის შეასრულონ, რასაც სატელევიზიო ეთერებიდან მოგვიწოდებენ, გაერთიანებისკენ, ერთად მოქმედებისკენ და ბრძოლისკენ, ყოველდღე ვხედავთ, რომ პარტიას ხლეჩენ, ყოფენ ადამიანებს, დევნიან. ცდილობენ, რომ პარტიაში განსხვავებული აზრი მოსპონ. ცდილობენ, რომ პარტიულ ჩარჩოებში ჩაკეტონ. საკუთარი პარტიული სტრუქტურა შექმნან, რომელიც ვიწროპარტიულ ინტერესებს მოემსახურება და არა საერთოს“, - განაცხადა დიმიტრი ბიძინაშვილმა.
- ამასთან, "ნაციონალური მოძრაობის“ ახალგაზრდული ორგანიზაციის კიდევ ერთი წევრის ანა კოპაძის განმარტებით, ახალ მენეჯმენტს არ სურს, რომ ახალგაზრდებს დაეკონტაქტოს და მათი აზრები გაითვალისწინოს.
"მოსვლის პირველივე დღიდან, ახალი მენეჯმენტი უარს აცხადებს და სურვილსაც არ გამოთქვამს, რომ დაეკონტაქტოს ახალგაზრდებს, რომლებიც ძალიან დიდი ხნის განმავლობაში პოლიტიკურ ამინდს ქმნიდნენ. მოსვლის პირველივე დღიდან, ოთახი, რომელშიც ახალგაზრდების ოფისი იყო, ახალი თავმჯდომარის პირადი დაცვის ოთახად გადაკეთდა. ეს არის სრულიად მიუღებელი, რადგან აშკარა ხდება ის, რომ არ აინტერესებს ამ ადამიანს ახალგაზრდების აზრი, არ აინტერესებს, რას ფიქრობს ახალი თაობა“,- განაცხადა კოპაძემ.
ბრალდებებს "ნაციონალური მოძრაობის“ ახალგაზრდულ ორგანიზაციაში პასუხობენ და აცხადებენ, რომ "ტყუილია“.
"ტყუილია, რომ ვინმე გათვალისწინებული არ იყო. ტყუილია, რომ ვინმე "მოვტეხეთ“, ეს ასე არ არის“, - განაცხადა "ნაციონალური მოძრაობის“ ახალგაზრდული ორგანიზაციის წევრმა, ტიტე გედენიძემ.
"ნაციონალური მოძრაობის" ახალგაზრდული ორგანიზაციის ყრილობა დღეს იმართება. ყრილობაზე სიტყვით გამოვა პარტიის თავმჯდომარე" ლევან ხაბეიშვილი.
ასევე იხილეთ:
- "ბევრს, ალბათ, მუხლები უკანკალებს, როცა გხედავთ. მინდა მათ ვუთხრა, რომ სწორად უკანკალებთ მუხლები... ერთი თხოვნა მაქვს, პროპაგანდა არ მოგერიოთ!" - ხაბეიშვილი ახალგაზრდებს
- "ახლა დაქსაქსვის, გათითოკაცების დრო არ არის... ეს მხოლოდ ივანიშვილის წისქვილზე ასხამს წყალს" - რას ამბობს ლევან ხაბეიშვილი ხატია დეკანოიძის ენმ-დან წასვლაზე?
- "ნაციონალური მოძრაობიდან“ წასვლის გადაწყვეტილება საბოლოოა და არ შეიცვლება - მთავარი მიზეზია ის, რომ..." - რას აცხადებს ხატია დეკანოიძე