ნორვეგიაში მიხეილ სააკაშვილს ადამიანის უფლებებისთვის და დემოკრატიისთვის ბრძოლის საქმეში პრიზი გადაეცა - ცერემონიას ექსპრეზიდენტის ვაჟი და დედა დაესწრნენ (ფოტოები)
საქართველოს მესამე პრეზიდენტს, მიხეილ სააკაშვილს ადამიანის უფლებებისთვის და დემოკრატიისთვის ბრძოლის საქმეში პრიზი გადაეცა.
აღნიშნულის შესახებ მიხეილ სააკაშვილი "ფეისბუქის“ გვერდზე წერს.
დაჯილდოების ცერემონია ნორვეგიაში გაიმართა.
"ჩემთვის დიდი პატივია ადამიანის უფლებების და დემოკრატიის უმაღლესი სტანდარტის ქვეყნისგან ჯილდოს მიღება, ადამიანის უფლებებისთვის და დემოკრატიისთვის ბრძოლის საქმეში.
ამ პრემიამ ნორვეგიისგან უნდა დააფიქროს ზოგიერთი ჩვენი თანამოქალაქე, რომელიც წლების განმავლობაში წამოეგო ჩემი გაშავების კამპანიას. უნდა დაფიქრდნენ ისინი, ვისაც ჩემი სრულიად უსამართლო და სამარცხვინო პატიმრობა დემოკრატიის და ადამიანის უფლებების საკითხად კი არა, რაღაც პოლიტიკურ გარჩევად მიაჩნია. ის, რომ ჩემს პატიმრობაზე ამხელა ნეგატიური რეაქციაა მთელ ცივილიზებულ სამყაროში და პოზიტიური მხოლოდ კრემლში და „ოცნებაში“, თითოეული ქართველის განსჯის საგანი უნდა იყოს“, - წერს სააკაშვილი.
დაჯილდოების ცერემონიას ექსპრეზიდენტის დედა, გიული ასალანია და სააკაშვილის ვაჟი ნიკოლოზი დაესწრნენ. მიხეილ სააკაშვილის წერილი სცენაზე ნიკოლოზმა წაიკითხა.