გერმანიის საგარეო საქმეთა მინისტრი ანალენა ბერბოკი თბილისში ჩამოვიდა. როგორც გერმანული გამოცემა "შპიგელი" წერს, თბილისის საერთაშორისო აეროპორტში დაფრენისას ბერბოკის თვითმრინავს პრობლემა შეექმნა, რადგან დასაფრენ ბილიკს სხვა თვითმფრინავი ბლოკავდა. პილოტი იძულებული გახდა აფრენილიყო, მეორე ცდაზე კი თვითმფრინავი წარმატებით დაჯდა. აღნიშნულ ინფორმაციასთან დაკავშირებით საქაერონავიგაცია განცხადებას ავრცელებს, რომელსაც უცვლელად გთავაზობთ:
"გუშინ, 23 მარტს, თბილისის დროით დაახლოებით 23:00 საათზე, გერმანიის საგარეო საქმეთა მინისტრის თვითმფრინავი Airbus A340-300 თბილისის საერთაშორისო აეროპორტში მეორე მცდელობაზე დაეშვა.
საქაერონავიგაცია კატეგორიულად უარყოფს გერმანული გამოცემა www.Spiegel.de-ის მიერ გავრცელებულ ინფორმაციას, თითქოს გერმანელი დიპლომატის ბორტს პრობლემა დასაფრენ ბილიკზე მდგომი სხვა თვითმფრინავის გამო შეექმნა.
დასაფრენი ბილიკი იყო სრულად თავისუფალი. პირველადი ინფორმაციით, აღნიშნული იყო სრულად პილოტის გადაწყვეტილება. აქვე აღვნიშნავთ, რომ ეკიპაჟის გადაწყვეტილებით მეორე წრეზე წასვლა დაფრენისას არის აპრობირებული - ნორმალური პრაქტიკა სამოქალაქო ავიაციაში და ინციდენტად არ ითვლება", - ნათქვამია გამოქვეყნებულ ინფორმაციაში.
