"უფლის წყალობით, მე ვუძლებ, აი, დათო ტურაშვილი კი, სამწუხაროდ, საავადმყოფოში მოხვდა!.." - რას წერს ანდრია ჯაღმაიძე?

საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე მწერალ დათო ტურაშვილის ავადმყოფობას ეხმაურება და "ფეისბუქის" პირად გვერდზე წერს:

"ერთგვარი დალოცვის ფორმა შეიძინა სიტყვებმა, - "გაძლება მოგცეს ღმერთმა"! ახლობლები, ნაცნობები, უცხო ადამიანები ამ სიტყვებს ხშირად მეუბნებიან. არაა იოლი გასაძლები! ვიცით, ვის რის ფასად უჯდება პატივისა და ღირსების შელახვის დათმენა?! უფლის წყალობით, მე ვუძლებ; აი, დათო ტურაშვილი კი, სამწუხაროდ, საავადმყოფოში მოხვდა! მინდა, ჯანმრთელობა ვუსურვო მას და ასევე ვისურვო, რომ ჩვენი საზოგადოება მეტად დაუფიქრდეს მის ნათქვამს, რომ სიტყვებიც შეიძლება მკვლელობის იარაღად იქცეს! ახლა კონკრეტულს არაფერს შევახსენებ ტელევიზიებს, რომლებსაც არაერთხელ ანალოგიური რამ გაუკეთებიათ, და მათ შორის ჩემს მიმართაც, ინტერნეტსივრცე კი, ისეთი რეალობაა, რომ, თუ იქ ერთხელ რამე მოხვდა, მუდმივად რჩება და მუდმივად შეგვახსენებს ამას. ამ ტელევიზიების საყურადღებოდ მინდა ვთქვა: კარგია, დათო ტურაშვილს რომ ექომაგებით, მართლაც დაინახეთ, რომ მკვლელობის, სამშობლოს ღალატისა და სხვა ცილისწამებათა დაბრალება ცუდი საქციელია?! იმედი ვიქონიოთ, რომ ხვალიდან ამგვარ უღირს საქციელს თავადაც მოერიდებით? ან შენდობას ითხოვთ უკვე ჩადენილზე? ან ამ პოსტს მშვიდად და გაცნობიერებულად მიიღებთ?"

შეგახსენებთ, მწერალი დათო ტურაშვილი გუშინ კლინიკაში გადაიყვანეს. ის ტელეკომპანია "ფორმულას" გადაცემა "მე-17 სართულს“ სტუმრობდა, სადაც ემოციური გამოსვლის შემდეგ თავი შეუძლოდ იგრძნო.

იხილეთ ასევე:

• როგორია დათო ტურაშვილის ჯანმრთელობის მდგომარეობა - რას ამბობს მწერლის ქალიშვილი?
• "დათო, გულს გაუფრთხილდი..." - უთქვამს დათო ტურაშვილისთვის იმ 78-თაგან ერთ-ერთს, ვინც რუსულ კანონს მისცა ხმა" - რას წერს ლაშა ბუღაძე?
• "წარმოუდგენელია, რაც ჩემს მიმართ იკადრეს. მე შეიძლება მართლა შევეწირო ამას" - რა თქვა დათო ტურაშვილმა ტელეეთერში, რის მერეც მისი კლინიკაში გადაყვანა გახდა საჭირო?