გარდაცვლილი ბავშვის ცხედარი სახლში მიასვენეს - გოგონას ბაბუა ამბობს, რომ ოჯახმა ექსპერტიზის ბიუროს ცხედრის გაკვეთის უფლება არ მისცა
დიდ დიღომში გარდაცვლილი ბავშვის ცხედარი ექსპერტიზის ბიუროდან სახლში მიასვენეს.
"საღსალამათი ბავშვი გაგუდული ვნახეთ ბუჩქებში და დასკვნა მარტივია - ვიღაცის ძალადობა. ასეთი უბედურება დაგვემართა. დავიღუპეთ", - ამის შესახებ დიდ დიღომში ნაპოვნი, გარდაცვლილი 12 წლის მოზარდის ბაბუამ ჟურნალისტებთან საუბრისას განაცხადა.
- როგორც ის აღნიშნავს, ოჯახმა სამხარაულის სახელობის ექსპერტიზის ბიუროს გოგონას გაკვეთის უფლება არ მისცა და ცხედარი სახლში უნდა გადაასვენონ.
"ჩემს დისშვილს რომ უთხრეს, უნდა გავკვეთოთო, გაგიჟდა, ბავშვი არ გამიკვეთოთო, პანიკაშია. საღ-სალამათი ბავშვი გაგუდული ვნახეთ ბუჩქებში და დასკვნა მარტივია - ვიღაცის ძალადობა. ასეთი უბედურება დაგვემართა. დავიღუპეთ," - აღნიშნავს ბაბუა.
მისივე თქმით, ამ დრომდე არ უპოვიათ გოგონას ტელეფონი.
"ტელეფონი სად გაქრა? არ გვიპოვია. ტელეფონი რომ გვეპოვა, ხომ ჩვენამდე მოვიდოდა. არც კრიმინალისტებს აქვთ, არც ჩვენ გვაქვს. გამორთულია," - აღნიშნავს ის.
ცნობისთვის, დიდ დიღომში 12 წლის მოზარდის გარდაცვალების საქმეზე შინაგან საქმეთა სამინისტრომ გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს. არსებული ინფორმაციით, გოგონას ყელის არეში დაზიანებები აღენიშნებოდა. არასრულწლოვანი გუშინ, პეტრიწის ქუჩის მიმდებარე ტერიტორიიდან დაიკარგა. ბოლოს ის ამავე ქუჩის მიმდებარედ, სკვერში საქანელაზე შენიშნეს, გვიან ღამით კი, სკვერიდან მოშორებით, ბნელ ადგილზე გარდაცვლილი აღმოაჩინეს.
- ნახეთ ასევე:
- "ბავშვი სათამაშოდ იყო გასული და გაუჩინარდა. შუაღამეს ვნახეთ "გარაჟებთან", გაგუდული..." - რას ამბობს გარდაცვლილი გოგონას ბებია?
- "გოგონას მამა ლიეტუველია... აღარ იყო ჩემი ანუშკი, ვეღარაფერი ვუშველეთ" - რა ხდება ცნობილი დიდ დიღომში მომხდარ დანაშაულზე
- "საქანელაზე ქანაობდა. შემდეგ ბავშვებმა დაინახეს, რომ ვიღაც აეკიდა..." - რა ვერსიები ვრცელდება დიდ დიღომში 12 წლის მოზარდის გარდაცვალების საქმეზე