"გოგონას მამა ლიეტუველია... აღარ იყო ჩემი ანუშკი, ვეღარაფერი ვუშველეთ" - რა ხდება ცნობილი დიდ დიღომში მომხდარ დანაშაულზე
უმძიმესი ტრაგედია მოხდა 16 მარტს, დიდ დიღომში, სადაც 12 წლის მოზარდი გარდაცვლილი გამთენიისას იპოვეს. შინაგან საქმეთა სამინისტრომ გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.
როგორც გოგონას ბაბუამ მანუჩარ დვალმა ambebi.ge-ს უთხრა, გარდაცვლილი მოზარდი მისი დის შვილიშვილი ანა იანუშაიტიტეა.
"გოგონას მამა ლიეტუველია. მოკლულია, აბა, ჯანმრთელ ბავშვს რა დაემართებოდა. ავადმყოფი არ იყო და არაფერი.... სათამაშოდ გავიდა, დეიდაშვილთან, სადღაც 9 საათზე გავიდა სახლიდან, ნახევარ საათში რომ არ ამოვიდა, დაიწყეს რეკვა, რომ არ უპასუხა, ძებნა დაიწყეს. გახდა 10, 11 საათი... მეც გამაგებინეს, აგერ ვცხოვრობ, მეზობელ კორპუსში. ამასობაში თქვეს იპოვესო, მაგრამ აღარ იყო ჩემი ანუშკი... ვეღარაფერი ვუშველეთ. ბავშვს თან ჰქონდა მობილური, რომელიც ამ დრომდე ნაპოვნი არ არის, გამორთულია, რომ ვრეკავთ. ზუსტად არაფერი ვიცით, დაადგენენ იმედია ყველაფერს..." - გვითხრა მანუჩარ დვალმა.
შემთხვევის ადგილზე კრიმინალისტებმა მუშაობა დაასრულეს.
არასრულწლოვანი გუშინ, პეტრიწის ქუჩის მიმდებარე ტერიტორიიდან დაიკარგა. ბოლოს ის ამავე ქუჩის მიმდებარედ, სკვერში საქანელაზე შენიშნეს, გვიან ღამით კი, სკვერიდან მოშორებით, ბნელ ადგილზე გარდაცვლილი აღმოაჩინეს.
იხილეთ ასევე: