“2008 წელიც გვახსოვს, როდესაც თქვენი სწორი გადაწყვეტილებების გამო აგრესორი შევაჩერეთ" - ალან გაგლოევი მოსკოვში  პუტინს შეხვდა და ცხინვალში დაპატიჟა

ოკუპირებული ცხინვალის ე.წ. პრეზიდენტი ალან გაგლოევი მოსკოვში პუტინს პირველად შეხვდა. ინფორმაციას ამის შესახებ რუსული სახელმწიფო გამოცემა “ტასი” ავრცელებს.

როგორც რუსული მედია წერს, შეხვედრისას პუტინმა აღნიშნა, რომ რუსეთსა და ე.წ. სამხრეთ ოსეთს შორის არსებული ურთიერთობების დახასიათება ზედმეტია, ვინაიდან, “განსაკუთრებული ხასიათი აქვთ, მაგრამ ურთიერთობები ყველა მიმართულებით ვითარდება, მათ შორის ეკონომიკურ სფეროშიც”.

“გასულ წელს ტვირთბრუნვის ზრდამ 12% შეადგინა, პრინციპში კარგი მაჩვენებელია. თითქმის ყველა პროგრამა ვითარდება: საინვესტიციო პროგრამა, სოციალურ-ეკონომიკური განვითარების პროგრამა, ფინანსური დახმარების პროგრამა, "სამხრეთ ოსეთის" საკრედიტო დახმარებისა და მხარდაჭერის პროგრამა”, - აღნიშნა პუტინმა.

გაგლოევის თქმით, “რესპუბლიკის ურთულეს მომენტებში” რუსეთი ყოველთვის გვერდით ედგა და დღესაც ფასდაუდებელ მხარდაჭერას უწევს.

“2008 წლის აგვისტოც გვახსოვს, როდესაც "სამხრეთ ოსეთის" ერი პრაქტიკულად სრული განადგურების საფრთხის ქვეშ დადგა, მაგრამ სრულიად სწორი და დროულად მიღებული გადაწყვეტილებები გამო აგრესორი შეჩერებულ იქნა”, - განაცხადა გაგლოევმა.

შეხვედრისას გაგლოევმა პუტინი საპატიო სტუმრის რანგში “რესპუბლიკის დამოუკიდებლობის მე-15 წლისთავის” აღსანიშნავად დაპატიჟა.

“წელს რუსეთის ფედერაციის მიერ "სამხრეთ ოსეთის" რესპუბლიკის დამოუკიდებლობის მე-15 წლისთავს აღვნიშნავთ და, შესაძლებლობით რომ ვისარგებლო, გპატიჟებთ "სამხრეთ ოსეთში" ყველაზე საპატიო სტუმრის რანგში და თქვენ ადგილზე ნახავთ "სამხრეთ ოსეთის" ხალხის თბილ, ნათესავურ, მადლიერ დამოკიდებულებას”, - განაცხადა გაგლოევმა.