ფოტოები ნეაპოლიდან - რა ხდებოდა და როგორია ვითარება ქალაქში, სადაც გერმანელმა ფანებმა არეულობა მოაწყვეს
ნეაპოლში ჩემპიონთა ლიგის მერვედფინალური მატჩი გაიმართა, სადაც ადგილობრივი კლუბი "ნაპოლი" ფრანკფურტის "აინტრახტს" დაუპირისპირდა, ანგარიშით 3-0 დაამარცხა და ისტორიაში პირველად გავიდა მეოთხედფინალურ ეტაპზე.
მატჩის დაწყებამდე "აინტრახტის" ფანებმა ქალაქი ბრძოლის ველს დაამსგავსეს.
ნეაპოლში იმყოფებოდნენ "აინტრახტის" ფანები, ე.წ. ულტრასები, ისინი "ნაპოლის" ფანებს და სამართალდამცველებს დაუპირისპირდნენ, რადგან მატჩზე დასწრება სურდათ, რაც იტალიის ხელისუფლების გადაწყვეტილებით, აკრძალული ჰქონდათ.
მედიაში ვრცელდება კადრები თუ რა ხდებოდა ქალაქში. როგორც სხვადასხვა გამოცემები წერენ, გერმანელმა ფანებმა ცეცხლი წაუკიდეს მანქანებს, მათ შორის, პოლიციის მანქანებს, ისმოდა აფეთქებების ხმაც.
ცნობისთვის, "აინტრახტის“ ფანებს იტალიის შინაგან საქმეთა სამინისტრომ ნეაპოლში მატჩზე დასწრება აუკრძალა. მიზეზი ისაა, რომ ამ გუნდებს შორის პირველი შეხვედრის დროს ფანებს შორის დაპირისპირება მოხდა. იტალიურმა პოლიციამ კი ინციდენტების თავიდან ასარიდებლად აღნიშნული გადაწყვეტილება მიიღო, თუმცა რეალურად, ეს გადაწყვეტილება უფრო მძიმე შედეგის მომტანი აღმოჩნდა.