დმიტრო კულება "ოსკარის" ორგანიზატორებს თვალთმაქცობაში ადანაშაულებს
უკრაინის საგარეო საქმეთა მინისტრმა დმიტრო კულებამ მკაცრად გააკრიტიკა „ოსკარის“ დაჯილდოების ორგანიზატორები იმის გამო, რომ მათ უარი განაცხადეს უკრაინის პრეზიდენტის, ვოლოდიმირ ზელენსკის ცერემონიაზე სიტყვით გამოსვლაზე.
უკრაინული მედიის ცნობით, გერმანულ მედიასთან ინტერვიუში კულებამ ამერიკის კინემატოგრაფიული ხელოვნების აკადემიის წევრების გადაწყვეტილებას "თვალთმაქცობის მაგალითი" უწოდა.
„ვფიქრობ, თუ ფილმი „დასავლეთის ფრონტი უცვლელია“ მიიღებს „ოსკარს“ საუკეთესო უცხოური ფილმისთვის, მაშინ როდესაც პრეზიდენტი ზელენსკი, რომელიც ომშია, ხელმძღვანელობს ქვეყანას, აწარმოებს ყველაზე დიდ ომს ევროპაში მეორე მსოფლიო ომის შემდეგ და არ გამოდის სიტყვით „ოსკარზე“, კინოინდუსტრიის ტოპ-მენეჯერებისა და პროდიუსერების თვალთმაქცობის უკეთეს მაგალითს ვერ იპოვით“, - განაცხადა კულებამ.
მან ხაზგასმით აღნიშნა, რომ როდესაც „ოსკარს“ პომპეზურად აღნიშნავენ და ომის შესახებ ფილმს აძლევენ ქანდაკებას, უკრაინაში მიმდინარე ომის საშინელება არ შეიძლება უგულებელყოფილი იყოს, რადგან ასეთი საქციელი თვალთმაქცობაა.