"საქართველოს ხელისუფლებამ შეანელა ევროპული ვნებები" - როგორ ეხმაურებიან რუსეთში ე.წ. უცხოური აგენტების შესახებ კანონის გარშემო თბილისში მიმდინარე მოვლენებს
"საით იღებ გეზს საქართველო?" - ამ სათაურით აქვეყნებს სტატიას გამოცემა zerkalo.az საქართველოში ე.წ. უცხოური აგენტების კანონის გარშემო მიმდინარე პროცესებთან დაკავშირებით...
"იცით, რა განასხვავებს ეროვნული დამოუკიდებლობის ნამდვილ მომხრეებს და დემოკრატებს სხვებისგან?! ის, რომ პირველები ნებისმიერ შემთხვევაში დემოკრატებად და ეროვნული დამოუკიდებლობის მომხრეებად რჩებიან, სხვები კი ნიავი საითაც დაუბერავს, იმას მიჰყვებიან, იმის მიხევდით, როგორ უკარნახებენ, ოღონდ საკუთარი რწმენით და სინდისით კი არა, სხვების მოწოდებით. ამ მხრივ გამონაკლისი არ არის მეზობელი საქართველოს მმართველი პოლიტიკური კოალიცია "ქართული ოცნება".
როცა ხელისუფლებაში მოვიდნენ, ყველა ფიქრობდა, რომ მოსკოვსა და თბილისს შორის მალე შედარებით მჭიდრო ურთიერთობა დამყარდებოდა, მაგრამ ოლიგარქ ბიძინა ივანიშვილს და მის ახალგაზრდა პოლიტიკურ გუნდს, ყოფილი ხელისუფლების საგარეო პოლიტიკაში კორექტირება არ შეუტანიათ; ამიტომ დარჩა შთაბეჭდილება, რომ მიხეილ სააკაშვილის ხელისუფლების მსგავსად, პროდასავლური იყო. ამ ხნის განმავლობაში "ქართულმა მეოცნებეებმა" ნატოსთან იმდენ დოკუმენტს მოაწერეს ხელი, რომ მათ ქვეყანას ალიანსის არაფორმალურ წევრად მოიხსენიებდნენ.
იგივეს თქმა შეიძლება ევროკავშირზე, იმის მიუხედავად, რომ რამდენიმე თვის წინ ევროკავშირმა, უკრაინისა და მოლდოვისგან განსხვავებით, საქართველოს "ევროკავშირის კანდიდატი სახელმწიფოს" სტატუსი არ მიანიჭა, ევროკავშირმა თბილისს რამდენიმე პირობა წაუყენა... საქართველოს ხელისუფლებას არ სურდა ქვეყანა რუსეთის "შავ გეოპოლიტიკურ სიაში" მოხვედრილიყო. თუმცა, რუსეთ-უკრაინის ომის დაწყებისთანავე საქართველოს ხელისუფლებამ შეანელა ევროპული ვნებები და გამოაცხადა, რომ არ დაუჭერს მხარს რუსეთის წინააღმდეგ სანქციებს... მოკლედ, საქმე იქამდე მივიდა, რომ დასავლეთმა საქართველოს მკაფიო გეოპოლიტიკური არჩევანის გაკეთება მოსთხოვა.
და როგორ უპასუხა საქართველომ დასავლეთის ამ მოთხოვნებს?!.. საქართველოს პარლამენტმა ცოტა ხნის წინ განაცხადა, რომ მალე დაიწყებს ახალი კანონპროექტის განხილვას, რომლის მიხედვითაც საერთაშორისო ინსტიტუტების მიერ დაფინანსებული არასამთავრობო ორგანიზაციები უნდა დარეგისტრირდნენ უცხოურ აგენტებად. მსგავსი კანონი მეზობელ რუსეთში რამდენიმე წელია მოქმედებს. ამიტომ, როგორც ჩანს, საქართველოში მიხვდნენ, რომ დასავლეთისგან სწავლა უსარგებლოა და რუსეთის გამოცდილებას მიმართეს", - წერს გამოცემა.
- გამოცემის ცნობით, რამდენიმე პოლიტიკურ მიმომხილველს მიაჩნია, რომ შესაძლოა, ასეთი ნაბიჯით თბილისს ევროკავშირზე ზეწოლა სურს. ამაში არის გარკვეული ლოგიკა, რადგან საქართველოს პარლამენტის განზრახვის გამოცხადების შემდეგ, ბრიუსელში ერთგვარი არეულობა დაიწყო...
"არსებობს სხვა მოსაზრებებიც. ახალი კანონპროექტის დახმარებით საქართველოს ხელისუფლებას სურს, ყურადღება გადაიტანოს ექსპრეზიდენტ სააკაშვილისგან, რომლის მდგომარეობა რეალურად მძიმეა. უკრაინის ხელისუფლების განცხადებით, "ქართული ოცნება" განზრახ კლავს მათ მოქალაქეს.
როგორ დასრულდება პროცესი, მიიღებს თუ არა აღნიშნულ კანონპროექტს საქართველოს პარლამენტი? ზუსტი პასუხები არ ვიცით, მაგრამ ვიცით, რომ საქართველოს ეშინია რუსული აგრესიის. მაგრამ ეს არ არის ერთადერთი შიში, "ქართულ ოცნებას" ძალაუფლების დაკარგვის ეშინია, ამიტომაც ეპყრობიან ასე სააკაშვილს, რითაც კრემლს კუდს უქიცინებენ" - წერს გამოცემა.
"საქართველოს პრეზიდენტი უცხო ქვეყნის აგენტების შესახებ კანონს ეწინააღმდეგება" - წერს რუსული გამოცემა tass.ru უცხოური აგენტების გამოვლენის შესახებ კანონთან დაკავშირებით.
გამოცემის ცნობით, დოკუმენტი ითვალისწინებს რეესტრის შექმნას, რომელშიც მოხვდებიან იურიდიული პირები ან მედია საშუალებები, რომელთა შემოსავლის 20%-ზე მეტი უცხოური დაფინანსებაა.
ინიციატივა პოლიტიკურ პარტია "ხალხის ძალას" ეკუთვნის. კანონპროექტი ოპოზიციისა და საზოგადოების დიდი ნაწილის მხრიდან კრიტიკის ცეცხლში მოექცა, თუმცა, ამის მიუხედავად, ავტორები მის ჩაგდებას არ აპირებენ" - წერს გამოცემა.
გამოცემა delfi.lt/ru-ს ცნობით, საქართველოში უცხოეთის აგენტებზე თავიანთი კანონი მოიფიქრეს. "ოპოზიციის თქმით, ეს არის რუსული კანონი!" -წერს გამოცემა.
მისივე ცნობით, მედიის, ოპოზიციისა და საზოგადოების დიდი ნაწილის აქტიურობის მიუხედავად, რომლებიც ირწმუნებიან, რომ საქართველოს ხელისუფლება რუსულ სცენარს იმეორებს, პარლამენტის ბიურომ მისი განხილვა მაინც დაიწყო...
"დასავლეთისგან შორს და რუსეთთან ახლოს - საქართველოს პრეზიდენტი მხარს არ უჭერს კანონს!" - წერს გამოცემა და ევროკომისიის მიერ საქართველოსთვის მიცემულ პირველ შეფასებასა და 12 პუნქტიან რეკომენდაციასაც ეხმაურება კითხვით, აახლოებს თუ არა აგენტებთან დაკავშირებული კანონი ქვეყანას ევროპასთან?!.
კიდევ ერთი გამოცემა rosbalt.ru წერს, რომ საქართველოში პარლამენტის იურიდიულმა კომიტეტმა უცხოური აგენტების შესახებ კანონპროექტები პირველი მოსმენით მიიღო.... გამოცემის ცნობით, ოპონენტები კანონს რუსულად აცხადებენ და მის პარლამენტიდან გამოწვევას ითხოვენ.
"სხდომა 9 საათის განმავლობაში პროტესტისა და კამათის ფონზე მიმდინარეობდა. შეხვედრა ოპოზიციასა და მმართველი გუნდის წევრებს შორის ჩხუბით დაიწყო, რის შემდეგაც რამდენიმე დეპუტატი ძალის გამოყენებით გაიყვანეს დარბაზიდან. პარალელურად, საპროტესტო აქცია მიმდინარეობდა პარლამენტის შენობასთან, რომელიც არასამთავრობო ორგანიზაციების, პოლიტიკური პარტიების წარმომადგენლები, ასევე სამოქალაქო აქტივისტებისა და მედიის ორგანიზებით დაიწყო. ისინი კანონპროექტის განხილვის შეწყვეტას ითხოვდნენ. მათი თქმით, ეს ინიციატივა საქართველოს ევროპულ კურსს ეწინააღმდეგება" - წერს გამოცემა.
ნახეთ ასევე: