"მე არ მინდა ისეთი ევროპა, რომელიც უკანონობას მაძალებს - დიახაც, არ მინდა ასეთი ევროპა" - ყაველაშვილი
მე არ მინდა ისეთი ევროპა, რომელიც უკანონობას მაძალებს. დიახაც, არ მინდა ასეთი ევროპა! - ამის შესახებ უმრავლესობის დეპუტატმა, „ხალხის ძალის“ წევრმა მიხეილ ყაველაშვილმა პარლამენტში საგარეო ურთიერთობათა და თავდაცვისა და უშიშროების კომიტეტების ერთობლივ სხდომაზე განაცხადა, სადაც ე.წ. უცხოური გავლენის აგენტების შესახებ საკანონმდებლო ინიციატივების განხილვა ხმაურის ფონზე მიმდინარეობს.
ყაველაშვილის თქმით, ეს არ არის ევროპა და ევროპული ღირებულებები.
"27 ქვეყანა, კონგრესმენები, ელჩები მოგვიწოდებენ, რომ ბატონი მიხეილ სააკაშვილი სამკურნალოდ გავუშვათ სხვა ქვეყანაში. დავარღვიოთ კანონი, კონსტიტუცია, მართლმსაჯულების დამოუკიდებლობა. თუ ეს ასე არ არის, შეგიძლიათ თქვენ მიკარნახოთ, როგორ არის შესაძლებელი, ამ დარღვევების გარეშე, მათი მოწოდებით, ჩვენ გავუშვათ მიხეილ სააკაშვილი. მე თავისუფალ ადამიანს, პარლამენტის წევრს, მაქვს თუ არა უფლება ამას შევეწინააღმდეგო და ვთქვა, რომ ეს არ არის ევროპა და ევროპული ღირებულებები, ეს პირიქით არის. მე, ვინც მომიწოდებს, რომ ადამიანის უფლებები დავარღვიო, კანონი დავარღვიო, კონსტიტუცია დავარღვიო, დიახაც, მე არ მინდა ასეთი ევროკავშირი! მე ვიცი, რა არის ევროპა. მე მინდა ევროკავშირი!“, - განაცხადა ყაველაშვილმა.
"ხახლის ძალის“ დეპუტატს „კანონი და სამართლის“ ლიდერმა, თაკო ჩარკვიანმა რეპლიკით უპასუხა: „რეფერენდუმია ჩატარებული, თქვენ ვინ გეკითხებათ?“.
რაზეც ყაველაშვილმა ასე უპასუხა:
"ქალბატონო, თაკო, თქვენ ან გაგება არ იცით, ან მოსმენა! მე არ ვლაპარაკობ, რომ ევროპა არ მინდა! უზრდელობაა, რასაც თქვენ აკეთებთ. მე არ მინდა ისეთი ევროპა, ვინც უკანონობას მაძალებს. დიახაც, არ მინდა ასეთი ევროპა! ნუ მასწავლით, არ არის ეგ ევროპა, მოსახლეობას ნუ ატყუებთ! მიხეილ სააკაშვილი გათავისუფლება ევროპაა? სირცხვილია ასეთი ევროპა“, - უპასუხა ყაველაშვილმა.
დეპუტატის თქმით, თუკი მესამე პრეზიდენტი მიხეილ სააკაშვილი არ გათავისუფლდება საქართველოს ევროკავშირში გაწევრიანების საკითხი კითხვის ნიშნის ქვეშ იდგება.
„თვალში ნაცარს გაყრიან და გეუბნებიან, რომ გაათავისუფლეთ ეს კაცი. რის საფუძველზე, შეგიძლიათ ვინმემ გვითხრათ? პასუხისმგებლობას იღებენ, რომ თუ არ გავათავისუფლეთ ჩვენს ევროკავშირში შესვლას კითხვის ნიშნის ქვეშ აყენებენ. ეს არის ევროკავშირი და ევროპა? ასეთი ევროპა მე არ მინდა. მე მინდა ღირსეული ევროპა. ღირსეულად უნდა შევიდეთ, ჩვენი იდენტობით, ჩვენი კულტურით, სპორტით, ის კი არა რომ კუბილიუსი მკარნახობდეს, თუ ჩემ წესებს არ შეასრულებთ, ვერ გახდებით ევროკავშირის წევრი“,- განაცხადა ყაველაშვილმა.