"გაიხარე მეგი... ჩვენი სიამაყე ხარ" - სოსო პავლიაშვილი მეგი გოგიტიძეს რუსული ტურნეების გამო აქებს
მეგი გოგიტიძე ტრადიციულად რუსულ ტურნეს აგრძელებს და ამჯერად როსტოვს სტუმრობს. მომდევნო დღეებში მომღერალს კონცერტები დაგეგმილი აქვს კრასნოდარში, სტავროპოლში, პიატიგორსკში, ნალჩიკსა და მახაჩკალაში. დიდი ხანია ცნობილია, რომ გოგიტიძეს უკრაინაში მიმდინარე ომის ფონზე, რუსეთში ჩატარებული კონცერტები უხერხულობას არ უქმნის.
გოგიტიძე ხშირად აქვეყნებს რუსეთში გამართული კონცერტების დროს გადაღებულ ვიდეოებზე, სადაც ძირითადად რუსულეოვანი ფანები ან რუსეთში მცხოვრები ქართველები უწერენ კომენტარებს. ერთ-ერთ ბოლო ვიდეოზე, მომღერალს რუსეთში მოღვაწე ქართული წარმოშობის მომღერალი, სოსო პავლიაშვილი აქებს:
"გაიხარე მეგი... ჩვენი სიამაყე ხარ" - წერს ქართულ ენაზე სოსო პავლიაშვილი. კომპლიმენტისთვის მეგი მადლობას უხდის.
სოსო პავლიაშვილი რუსეთში მოღვაწე იმ ქართველებს შორის არის, რომლებსაც არასოდეს გაუპროტესტებიათ უკრაინაში მიმდინარე ომი. უფრო მეტიც, პავლიაშვილი ძველებურად აგრძელებს კარიერას და რამდენიმე თვის წინ ბაშკორტოსტანის სახელმწიფო საკონცერტო დარბაზში პავლიაშვილმა ოკუპირებული დონეცკიდან და ლუგანსკიდან ჩასულ მასწავლებლებსა და მოსწავლეებს უმასპინძლა და მათ „პატრიოტული კონცერტი“ გაუმართა. კონცერტის სახელწოდება გახლდათ „ჩვენ ერთად ვართ, ჩვენ მეგობრები ვართ“ და ის რუსეთის მხარდასაჭერი კონცერტების სერიას წარმოადგენს.