უცნაურად გაუჩინარებული ქალის ცხედარი იპოვეს, თუმცა მისი გარდაცვალების მიზეზი კვლავ ამოუხსნელია - ამბავი, რომელმაც დიდი ბრიტანეთი შეძრა

უკვე რამდენიმე კვირაა ბრიტანეთში განხილვის ერთ-ერთი მთავარი თემაა 45 წლის ნიკოლა ბულის გაუჩინარების ამბავი. ქალი 27 იანვარს უცნაურ ვითარებაში გაქრა.

მისი ცხედარი მხოლოდ გასული კვირის შაბათს იპოვეს, 21 თებერვალს კი ოფიციალურად დადასტურდა, რომ გარდაცვლილი ნამდვილად დაკარგული ქალი იყო. თუმცა, ამ ამბავში ყველაფერი კვლავ ბუნდოვანია.

ნიკოლა ბული, პარტნიორთან და ექვსი და ცხრა წლის ქალიშვილებთან ერთად, ინგლისის ჩრდილო-დასავლეთით, პატარა ქალაქ სენტ მაიკლს-ონ-ვაირში ცხოვრობდა და იპოთეკის კონსულტანტად მუშაობდა.

27 იანვარს ქალმა ბავშვები მანქანით სკოლაში წაიყვანა, შემდეგ სახლში დაბრუნდა და სასეირნოდ წავიდა სპანიელის ჯიშის ძაღლთან ერთად. ხელში ტელეფონი ეჭირა: ჯერ ელფოსტაზე წერილი გაუგზავნა თავის უფროსს, შემდეგ კი მობილური აპლიკაციის მეშვეობით კოლეგებთან ონლაინშეხვედრაზე დაკავშირება სცადა, რაც სტანდარტული პრაქტიკაა პანდემიის შემდეგ.

დილის 8:43 საათზე ქალი ერთმა ადამიანმა ნახა, რომლის თქმითაც, ძაღლთან ერთად მდინარესთან სეირნობდა, 9:10 საათზე ის სხვა მოწმემაც შენიშნა.

უკვე 9:30 საათზე ნიკოლა ბულის ტელეფონი მდინარის პირას, სკამზე გამვლელმა მამაკაცმა იპოვა, შეხვედრის აპლიკაცია ჯერ კიდევ გახსნილი იყო. მისი თქმით, ძაღლს საბელი მოხსნილი ჰქონდა და იქვე დარბოდა.

• "თუ ცხედარი მდინარეშია, მას აუცილებლად ვიპოვით"

ახლომახლო დაპირისპირების და შესაძლო ძალადობის აშკარა ნიშნები არ ჩანდა, თავდაპირველად პოლიციამ არც კი განიხილა ქალის ძალმომრეობის შედეგად გაუჩინარების ვერსია. ცხედარის ძებნა მდინარეში დაიწყეს, თუმცა უშედეგოდ.

ძებნაში ჩაერთო კერძო დეტექტივ-კონტრაქტორი პიტერ ფოლდინგი, რომლის კომპანიაც ცხედრების პოვნის მიმართულებით სპეციალიზირდება. მან კატეგორიულად განაცხადა, - თუ ქალის ცხედარი მდინარეშია, ვიპოვითო...

გავიდა რამდენიმე დღე, ერთი კვირა, კიდევ კვირა... ცხედარი ვერ იპოვეს.

ნიკოლა ბულის გაუჩინარების ისტორია მთელი ამ ხნის განმავლობაში მედიის ყურადღების ცენტრში იყო. პროცესში მოყვარული დეტექტივები და მოზარდები ჩაერთვნენ. ეს უკანასკნელები მიდიოდნენ ქალის გაუჩინარების ადგილას და თავიანთი ტიკ - ტოკ არხისთვის ვიდეოებს იღებდნენ. რის შემდეგაც, პოლიციამ სპეციალური განცხადება გაავრცელა, რათა მსგავსი რამ შეწყვეტილიყო.

მდინარე უაირზე მდებარე ხიდის მოაჯირზე ასობით ყვითელი ლენტი გამოჩნდა, რაც ხალხს აფრთხილებდა, რომ მდინარის სანაპიროსთან არ მისულიყვნენ...

• რა განაცხადა პოლიციამ?

რადგან ქალის პოვნა ვერაფრით ხერხდებოდა, პოლიცია საზოგადოების კრიტიკის ქარცეცხლში მოექცა, მას თავს ესხმოდა პრესაც, რის მერეც პოლიციამ გააკეთა განმარტება, რომ თითქოს ქალს მენოპაუზის გამო ალკოჰოლთან დაკავშირებული პრობლემები ჰქონდა, რამაც მის ქცევაზე იმოქმედა და რომ 10 იანვარს, ნიკოლას გაუჩინარებამდე ორი კვირით ადრე, პოლიცია და სოციალური მუშაკები მის ოჯახში გარკვეული ინციდენტის გამო მივიდნენ.

ამ განცხადებამ უკიდურესად გააღიზიანა დაკარგული ქალის ოჯახის წევრები, ისინი აცხადებდნენ, რომ სამართალდამცავებმა საკუთარი უსუსურობის დასაფარად, ქალის პირადი ცხოვრება საჯაროდ გამოფინეს.

თემთა პალატის ლიდერმა და პრემიერ-მინისტრობის ყოფილმა კანდიდატმა პენი მორდონტმა ამ ინფორმაციის გავრცელებას შოკისმომგვრელი უწოდა.

"ჯანმრთელობის მსგავსი დეტალების საჯაროდ გამოფენა, ნამდვილად გააღიზიანებს ბევრ ქალს. ჩვენ უნდა შევეგუოთ ყველა სახის სექსისტურ ქცევას ყველანაირ სიტუაციაში?" - განაცხადა მან. მისი აზრითაც, ამ გზით პოლიცია თავის დაცვას ცდილობდა, რადგან გამოძიება წინ ვერ მიდიოდა.

პოლიციამ ამბობდა, რომ საქმეზე ათობით დეტექტივი მუშაობდა, რომლებიც ასობით საათის განმავლობაში შიფრავდნენ სათვალთვალო კამერებიდან ამოღებულ კადრებს. დაკითხეს მინიმუმ შვიდასი მძღოლი, რომლებიც 27 იანვარს სავარაუდო ინციდენტის ტერიტორიაზე მანქანით გადაადგილდებოდნენ. გაჩხრიკეს ირგვლივ მდებარე რამდენიმე ცარიელი სახლი, მაგრამ უშედეგოდ.

პიტერ ფოლდინგის კერძო კომპანიამ გამოაცხადა, რომ ასრულებდა ძებნას, რადგან ცხედარი მდინარეში არ იყო.

• ცხედარი მდინარესთან

9 თებერვალს, დილით, ნიკოლა ბულის ცხედარი დაქორწინებულმა წყვილმა იპოვა მდინარის სანაპიროზე.

ისინი ძაღლთან ერთად სეირნობდნენ მდინარე უაირის ნაპირზე, ქალის სავარაუდო გაუჩინარების ადგილიდან სულ რაღაც 1,5 კილომეტრში.

ამის შემდეგ მედიასა და სოციალურ ქსელებში პოლიციისა და განსაკუთრებით პიტერ ფოლდინგის კომპანიის მისამართით კრიტიკული კომენტარები გამოჩნდა. პოლიცია თავს იმართლებდა, თითქოს მათ ყველაფერი გააკეთეს და გამოძიებაში მონაწილე ბევრი დეტექტივისთვის ეს საქმე ყველაზე მძიმე საქმე აღმოჩნდა მათ ცხოვრებაში.

პიტერ ფოლდინგმა აღიარა, რომ მისი გუნდი ნამდვილად იმყოფებოდა იმ ტერიტორიაზე, სადაც საბოლოოდ ცხედარი იპოვეს. მაგრამ ისინი მდინარის ფსკერს მთელ სიგანეზე ათვალიერებენ, ქალის სხეული კი თითქმის ზედაპირზე ნახეს, ის მცენარეებით იყო დაფარული.

• "აუხსნელი სიკვდილი"

რა გახდა ქალის გარდაცვალების მიზეზი? - ამ კითხვაზე პასუხი ჯერჯერობით არ ჩანს. პოლიცია ნიკოლა ბულის სიკვდილს "აუხსნელს“ უწოდებს. ცხედარზე არ აღმოჩნდა ძალადობის კვალი.

თუ ეს თვითმკვლელობაა, მაშინ ეს სრულიად სპონტანური იყო, წესით მას რაიმე შოკისმომგვრელი ინფორმაცია უნდა მიეღო, მაგრამ მის ტელეფონში არც საეჭვო ზარი და არც შეტყობინება არ უნახავთ. ამასთანავე, 27 იანვრამდე მომხდარი მოვლენები არანაირად არ მიუთითებდა ნიკოლა ბულის თვითმკვლელობის განზრახვაზე.

თუ ეს უბედური შემთხვევაა და ქალი უბრალოდ, მდინარეში ჩავარდა, მაშინ გაუგებარია, რატომ დატოვა ტელეფონი და გაუშვა ძაღლი. გარდა ამისა, ამ ტერიტორიაზე მდინარეს არ აქვს ციცაბო ნაპირები, არც განიერია და არც ღრმა.

”ჩვენ ვერასოდეს გავიგებთ, რა განიცადა ნიკიმ მისი სიცოცხლის ბოლო წუთებში, ის არასოდეს მიგვატოვებს. ჩვენ არასოდეს დავივიწყებთ ნიკის, სწორედ მან გახადა ჩვენი ცხოვრება ასე განსაკუთრებული. გოგონები მიიღებენ საჭირო დახმარებას იმ ადამიანებისგან, რომლებსაც ისინი ყველაზე მეტად უყვართ”, - წერია ოჯახის მიერ გავრცელებულ განცხადებაში.